CEBU, Philippines - Naangol ang usa ka 22 anyos nga lalaki human kini lubaa sa iyang gikainom nga silingan didto sa sitio Dunggoan sa barangay Basak, dakbayan sa Mandaue sa miaging gabii.
Ang biktima mao si Nickson Alivio, ulitawo, ug ang suspetsado mao si Ruel Emano, 37, kinsa pulos taga Basak. Si PO3 Ritchele Andales nga nahinabi sa Banat News miingon nga gikainom sa biktima ug sa uyoan niini ang suspetsado sa usa ka tindahan sa nahisgotang dapit.
Dihang nahurot na ang ilang giinom nga bino mikuha og kuwarta ang uyoan sa biktima aron ipalit og dugang ilimnon.
Apan gibadlong kini sa biktima nga gikasuko usab sa suspetsado nga maoy hinungdan sa ilang lalis.
Ang suspetsado kinsa wala na makapugong sa iyang kaugalingon milanit dayon sa gitangkil niyang kutsilyo ug gihansakan sa makadaghan ang lawas sa biktima ug maayo nalang kay wala kini maintimano.
Ang biktima gihatod dayon sa Vicente Sotto Memorial Medical Center sa dakbayan sa Sugbo samtang ang suspetsado nagkagulkol na karon sa prisohan human kini motahan ngadto sa kapolisan. - BANAT NEWS