Lolo nakuryentihan sa poste patay

CEBU, Philippines - Usa ka mag-uuma ang napalgang patay ug gituuhang nakuryentihan tupad sa usa ka poste sa kuryente sa miaging adlaw sa sitio Lower Bangkal barangay Guba ning dakbayan.

Ang patay’ng lawas nailhan nga si Marcelo Arojado Magdadaro, 50, molupyo sa nahisgutang lugar.

Matud pa sa silingan nga si Jackilou Colo Leyson padulong siyang mokawos og tubig dihang iyang nabantayan si Magdadaro nga nagbuy-od diha sa yuta.

Nakit-an usab duol sa gikabuy-uran niini ang usa ka hagdanan nga gisandig sa poste sa kuryente.

Tungod sa iyang kabalaka dali siyang nangayo og tabang sa ilang mga silingan ug gidali kini sa pagdala sa Guba District Hospital apan gideklarar kini nga dead on arrival sa mga doktor.

Sa pakighinabi sa Banat News ni PO2 Julius Mabunay kini nagkanayon nga posibleng nakuryentihan kini tungod kay matud pa sa mga kaliwat sa biktima nga sa wala pa kini nakaplaging patay mipahibalo kining magtaod og bombilya sa poste kini tungod kay ngiob man ang ilang dapit.

Dugang pa ni Mabunay nga ila usab irekomendar nga ipa-awtopsiya ang patay’ng lawas tungod kay dunay nakit-ang samad sa iyang agtang nga posibleng maoy hinungdan sa iyang kamatayon.

Wala usab matino kun mi-tap lang ba si Magdadaro sa linya sa kuryente sa maong poste.   (Lesley Caminade)   (BANATNEWS)