1 patay sa bangga

CEBU, Philippines - Patay ang usa ka lalaki samtang grabe ang kahimtang sa angkas niining 4-anyos nga pag-umangkon human mosampak sa railings sa dalan sa barangay Poblacion lungsod sa Santander kagahapon sa buntag.

Wala na makaabot nga buhi sa tambalanan si Roger Burtanog, 39, taga barangay Liptong sa nahisgutang lungsod tungod sa grabeng naangkong kadaot sa ulo samtang talandugon usab ang pag-umangkon niining si Jestoni Prejoles.

Sa pakighinabi sa Banat News ni PO1 Roel Gerodias kini mitug-an nga padulong na pauli ang duha gikan sa lungsod ug mi- overtake sa usa ka dump truck apan nawad-an kini og control sa manobela ug adto napunta sa poste sa railings sa dalan.

Ang duha nangalagpot gikan sa motorsiklo ug ang ulo ni Burtanog maoy unang mitugpa diha sa poste ug namatay kini diha dayon samtang gitabang ang bata ug gidala sa Oslob District Hospital. (Lesley Caminade)    (BANATNEWS)