Natulog sa karsada naligsan patay

CEBU, Philippines - Usa ka 57-anyos nga lolo nga gituohang hubog ug nakatulog diha sa karsada ang wala na makamata hum,an maligsi og multicab diha sa barangay Bato siyudad sa Toledo niadtong Huwebes sa ala-una sa kaadlawon.

Ang biktima nga namatay diha-diha mao si Rogelio Mandalones, 57, nagpuyo sa nahisgutang lugar samtang ang nakadasmag kaniya mao ang multicab nga kolor puti nga gimaneho ni Detchie Mahilum, 25, nagpuyo gihapon sa maong dapit.

Matud ni PO1 Celso Maquidato sa Toledo City Police dihang nahinabi sa Banat News, ang biktima gituohang hubog kaayo ug naglingkod sa karsada ug sa tantong lingkod-lingkod nakatulog kini.

Ang drayber sa multicab nga si Mahilum kinsa naatol sa pag-agi sa maong lugar wala makamatikod sa tawong naghigda diha sa iyang agianan ug diha nalang niya kini mabatyagi dihang milagubo ug may nabangil sa ilawom.

Matud pa sa drayber ngadto sa kapolisan nga ngitngit kaayo ang palibot maong wala dayon niini mabantayi ang biktima diha sa iyang agianan. Matud sa report napasok sa ilawom sa sakyanan ug naguyod pa og pipila ka metros.

Tungod sa grabeng kadaut sa ulo ug kalawasan sa biktima namatay kini diha dayon ug wala na madala pa sa tambalanan.

Ang drayber boluntaryo sab dayong mitahan sa iyang kaugalingon human sa hitabo ug gikatakdang pasakaan og kaso sa mga kabanay sa namatay.

De karga nagbangga 1 patay, 4 angol

Duha ka trak de karga ang nagsungag nga miresulta sa kamatayon sa usa ug pagkaangol sa laing upat ka tawo didto sa barangay Uling, lungsod sa Naga niadtong Huwebes sa udto.

Ang namatay mao ang truck boy sa Fuso 10-wheeler truck nga si Felomino Caballes, 18, taga barangay Guadalupe, siyudad sa Sugbo samtang naangol ang drayber niining si Lionel Dalot, 38, molupyo gihapon sa Guadalupe siyudad sa Sugbo, Porferio Quezon Jr., 37, taga barangay Tuyom lungsod sa Carcar, ang drayber sa Mitsubishi Fuso, nga taga Carcar, ug ang duha ka truck boy niini nga sila si Ryan Watin, ug Rodrigo Pangulan.

Matud pa ni PO2 Miguel Castañares sa Naga Police dihang nahinabi sa Banat News nga ang 10-wheeler truck nga gisakyan sa mga biktima nagdulhog gikan sa siyudad sa Toledo paingon sa dakbayan sa Sugbo samtang ang gikasungag gikan usab sa Naga ug nagtungas paingon sa siyudad sa Toledo niadtong tungora.

Pag-abot sa maong lugar ang 10-wheeler truck sa mga biktima nawad-an og preno samtang nagdulhog hinungdan sa ilang pagkabangga sa gikasugat nga trak. Tungod sa kakusog sa dagan sa nagdulhog nga trak napiit ang drayber sa napiyaping unahang bahin niini ug natagak usab ang truckboy nga si Caballes ug patay diha-diha.

Samtang ang drayber sa namatay gidala sa tambalanan ug boluntaryo usab dayong mitahan si Quezon sa kapolisan samtang nagpaabot og tukmang kaso.   - Lesley Caminade (BANAT NEWS)