National Shrine sa Talisay guba na

CEBU, Philippines - Ang National Shrine diha sa dakbayan sa Talisay nga replika sa mga estatuwa sa armadong kusog sa panahon pa sa World War II nagkaanam na og kaguba tungod sa taya.

Pipila niining maong mga estatwa nangaputlan na og mga kamot ingon man ubang parte ug huramintas sa lawas kini bisan paman ginama sa bronse ug bato.

Duna say report gikan sa mga residente sa barangay Poblacion diin mahimutang ang maong shrine nga may mga estatuwang gipanglunggoan na sa kamot, nangapungil ang nagkalain-laing parte sa lawas, nanga-ukal na ang mga pintal ug gipangtaya na ang mga poste sa suga.

Dugang pa sa mga residente nga walay igong mga suga ang maong monumento panahon sa kagabhion ug tambayan pa kini sa mga batan-ong mag-skateboard og magbiseklita sa maong sagradong monumento gumikan kay walay magbalantay nga nag-atiman.

 Sa pakighinabi sa Banat News ni Shirley Belleza, chairman sa Tourism Heritage Historical Affair, siya buot nga mopaimbestigar sa human resource department sa mga sakop sa Civil Security Unit sa Talisay nga gitahasan sa pagbantay nga kalikayan ang pagyama-yama sa maong monumento.

“Its a sacred place a lot of ancestors shed blood for the freedom we enjoy today,” ambit pa ni Belleza. Miawhag usab kini sa General Service Office sa maong dakbayan ang dali nga pagpaayo niini.

Si Richel Bacaltos, City Administrator sa Talisay sa iyang bahin mibutyag nga ipaimbestigar usab niini ang CSU head nga si Roger Villaver kabahin sa pagpabaya sa maong shrine ug ingon man ang pagpaayo niini. - BANAT NEWS