Duha ka 14-anyos gipusil sa Mandaue

CEBU, Philippines - Samaran ang duha ka 14-anyos nga batang lalaki human gipamusil sa usa ka batan-on sa dalan F.F. Cruz sa Mandaue Reclamation Area sa milabay’ng gabii.

Ang duha ka biktima pulos mga residente sa Sitio Fatima, barangay Subangdaku, dakbayan sa Mandaue ug nanginabuhi lamang pinaagi sa pagpamasura.

Base sa pasiunang imbestigasyon ni SPO1 Dindo Montesclaros sa Station 2 sa Mandaue City Police Office, nasayran nga samtang nagpahulay ang duha ka mga bata sa usa ka center island sa maong dapit, kalit lang miabot ang wala mailhing batan-on ug dayong pamusil ngadto kanila ginamit ang wala pa mahibaw-ing kalibre sa armas.

Ang 14-anyos naigo sa walang dapidapi samtang ang usa naigo sa liog ug abaga hinungdan nga nalandig kini sa Mandaue City Hospital. Hinuon luwas na sila sa makuyaw’ng kahimtang.

Samtang padayon pa nga gisusi sa kapolisan kun kinsa ang batan-on nga namusil lakip na ang motibo sa krimen.

Nagduda si SPO1 Montesclaros nga paregla lamang ang gihimo sa batan-on ug walay kalambigitan sa panagbangi sa fraternity sa dakbayan sa Mandaue.   - Bong Soriano (BANAT NEWS)