Pagbuwag sa Banawa-Englis sa Guadalupe aprobado na sa Senado - Rep. Cuenco

CEBU, Philippines - Naaprubahan na sa Senado ang balaudnon ni Kongresista Antonio Cuenco nga magbuwag sa sitio Banawa ug Englis gikan sa barangay Guadalupe.

Matud pa sa kongresista nga ang pirma na lang nila ni Senate president Juan Ponce Enrile ug ni House speaker Prospero Nograles ang kulang niini.

Nagkanayon si Cuenco nga sa higayon nga kini mapirmahan na sa mga lider sa kongreso, kini iduso na ngadto sa buhatan sa presidente. Gitataw sa kongresista nga kung mapirmahan na usab ni presidente Gloria Macapagal Arroyo ang balaudnon, kini ipublikar sa lokal ug nasudnong mga pamantalaan.

Human sa 15 ka adlaw, ang Comelec mahimo nang mopahigayon og plebisito labot sa iyang proposal.

Giklaro sa kongresista nga kung mopabor ang mayoriya sa mga molupyo sa barangay Guadalupe, hingpit na unyang mamahimo nga usa ka barangay ang Banawa ug Englis.

Malaumon hinuon ang kongresista nga mouyon ang mga residente nga iyang balaudnon tungod kay ang mga molupyo mismo giingong maoy nangayo niini. Sa iyang bahin, gipadayag ni Mayor Tomas Osmeña nga siya dili supak sa pagbuwag sa nahisgutang barangay tungod usab sa ka dako sa Guadalupe.

Gani gusto pa sa mayor nga himuon gyud tulo ka barangay ang Guadalupe pinaagi sa paghimong laing barangay sa Banawa ug laing barangay usab sa Englis. “Sige na lang, atong ipadayon ang bill pero kung dili ganahan ang mga tawo by two, then I will introduce the bill divided by three,” nagkanayon si Osmeña.

Butang nga gihangop usab sa mga sakop sa Banawa-Englis Separation Movement (BESM) nga maoy nangusog nga sila mabuwag sa Guadalupe.

Matud sa presidente sa BESM, Antonio Dangcalan, nga sila naglaum nga mahingpit nang balaud ang proposal sa kongresista aron ang duha ka sitio mahimo na usab nga barangay.  -  BANAT NEWS