Ombudsman 'tak-om' sa mga pamahayag ni Sonny Osmeña

CEBU, Philippines - Misamot og likay si Deputy Ombudsman for the Visayas Pelagio Apostol sa paghatag og komentaryo sa bag-ohay lamang nga gibulgar ni kanhi senador John Henry ‘Sonny’ Osmeña kinsa miingon nga iyang nasakpan si Apostol nakigtagbo ug nakigpangaon sa usa ka dakong politiko dinhi sa Sugbu nga may nag-ungot nga kaso sa Ombudsman Visayas.

Dihang gitawgan ang buhatan si Apostol, ang executive assistant ni Apostol nga si Jojo Fernandez mipahibawong dili motubag si Apostol sa gipamahayag ni Sonny Osmeña.

Samtang si Assistant Ombudsman Virginia Palanca Santiago mibalibad usab sa paghatag og komentaryo sa maong isyu pinaagi sa pag-ingon nga dili siya pwedeng motubag sa maong isyu.

Dunay gipatumang ‘gag order’ si Apostol nga nagdili sa mga opisyales ug mga kawani sa Ombudsman nga makighinabi sa mga sakop sa media sa bisan unsang isyu sa Ombudsman ilabina sa kaso sa giingong overpriced nga CICC ug uban pang mga kontrobersiyal nga isyu.

Nasayran nga si Osmeña mitug-an sa interview sa DyRF nga niadtong Martes sa udto nakita niya si Apostol sa usa ka kan-anan sa uptown area nga nakigtagbo ug nakigpaniudto sa usa ka politikong may pending nga kaso sa Ombudsman.

Gani giduol pa sa kanhi senador si Apostol aron pagpakiglamano dungan ang pag-abi-abi kaniya og ‘Merry Christmas.’

Matud pa sa kanhi senador nga nakita niyang nakuratan ug nangluspad ang panagway ni Apostol dihang nakita niini ang kanhi senador.

Apan dihang gipangutana si Osmeña kun si kinsa ang maong politikong giingong kauban ni Apostol pagpangaon, nagdumili ang kanhi senador sa pagbutyag niini.  -  BANAT NEWS