Yapha gibiyaan sa mga mayor

CEBU, Philippines - Gipadayag ni kanhi kongresista Antonio Yapha Jr., nga wala gyud siyay pagmahay bisan ug gibiyaan siya sa mayoriya sa mga mayor sa tersiro distrito niining subli niyang pagpapili og balik pagka kongresista atbang ni kongresista Pablo John Garcia nga igsoon ni Gobernador Gwendolyn Garcia.

Sa interview sa Bantay Radyo nagkanayon si Yapha nga ang mga mayor lang sa kalungsoran ug siyudad sa Toledo maoy mibiya kaniya ug sa pagkakaron namasilong kini sa administrasyon apan ang mga ordinaryong mga molupyo sa tibuok distrito nagpabiling misuporta kaniya.

Matud ni Yapha nga pagkakaron may usa pa ka mayor sa maong distrito nga nagpabiling misuporta ug walay lain kundili ang iyang anak nga si Mayor Geraldine Yapha sa lungsod sa Pinamungajan.

Kini human mitapon sa One Cebu ug tua na mosuporta kang kongresista Garcia ang mayor sa lungsod sa Tuburan nga si Boyet Suezo, ingon man ang mayor sa Toledo nga si Arlene Zambo, ug mayor sa Barili nga si Fermin Dasmariñas.

Apan gipasalig ni Yapha nga mohatag gihapon siya og igong away sa umaabot eleksiyon sa iyang distrito tungod kay 80 ngadto sa 90 porsyento sa iyang mga tinabangan sa distrito ang pabiling mipadayag og suporta ngadto niya ug sa Liberal Party (LP).

Gipadayag ni Yapha nga iyaha usab nga ikampanya sa distrito si LP governatorial candidate Hilario Davide III batok kang incumbent Governor Garcia ingon man si incumbent vice Governor Greg Sanchez Jr. nga lumad usab nga taga lungsod sa Tuburan.

Giklaro hinoon ni Yapha nga kadaghanan sa mga proyekto nga napatuman karon sa maong distrito ilabina ang pagpa-aspalto sa Asturias,Tuburan road sa iyaha pa kining administrasyon nga giingong giangkon karon ni incumbent congressman PJ Garcia. - Darrel A. Carumba (BANAT NEWS)