2 ka Rama petisyonan ni Mike

CEBU, Philippines - Moduso og petition for disqualification ang kandidato sa Bando Osmeña Pundok Kauswagan (BOPK) pagka-mayor sa siyudad sa Sugbu nga si Bise Mayor Michael Rama batok sa kandidatura sa laing duha ka Rama.

Si Kapitan George Rama sa barangay Basak-San Nicolas mibutyag nga ang Kugi Uswag Sugbu (Kusug) nangita og kandidato nga dunay apelyidong Rama aron maoy mohulip sa kandidato sa Laban ng Demokratikong Pilipino (LDP) pagka-mayor nga si Ricci Ranili.

Ang chairman sa Kusug nga si kanhi Mayor Alvin Garcia mao usab ang chairman sa LDP sa dakbayan ug maoy mipirma sa certificate of nomination ni Ranili.

Kusganon hinuong gihimakak ni Garcia ang pasangil ni Rama.

Apan ang gibiyaan ni Ranili gihulipan sa usa ka Dorotheo Rama ug usa ka Serafin Rama ang gihimo niining bise mayor sa LDP.

Si Garcia maoy nagpirma sa certificate of nomination ni Serafin.“Ila kong papirmahon dili man ko mopirma, dili nako na style oy, pildihon nako si Mike sa patas nga paagi, modaug man gyud ko,” sumala ni Garcia.

Matud ni George nga moduso gyud sila og petisyon ngadto sa Comelec-Manila tungod kay giingong tataw nga pagpanglawgaw ang gihimo sa oposisyon.

Gipahibalo ni Comelec-7 director Ray Rene Boac nga mahimong si bisan kinsa nga makaduso og petisyon batok sa usa ka kandidato.

Gipadayag ni Boac nga ang petisyon kinahanglang himuon sulod sa lima ka adlaw human sa substitution ug kini ideretso sa Comelec-Manila.

“Ang deadline man gud for the printing of ballots is on the second week of January, so, I guess Comelec will decide on this before that time,” nagkanayon si Boac.  – BANAT NEWS