Armas sa pagmasaker gipangita

CEBU, Philippines - Gipangita karon sa kapolisan ang usa ka Korean-made K3 light machine gun nga maoy gikatahong gigamit ni Datu Andal Ampatuan Jr. niadtong Nobyembre 23 sa pagmasaker sa 57 ka tawo nga naglakip sa 30 ka mga sakop sa media didto sa lungsod sa Ampatuan, lalawigan sa Maguindanao.

Ang eye witness nga giimbistigar sa mga kapolisan mibutyag nga si Datu Andal Ampatuan gyud maoy migamit sa maong armas nga iyang girakrak sa tanang biktima.

Matud ni Chief Superintendent Raul Castaneda, imbestigador sa Criminal Investigation and Detection Group (CIDG) nga ang ilang key witness   nga si PO1 Rainer Ebus mibutyag kanila sa mga posisyon sa mga suspetsado sa ilang pagmasaker sa mga biktima.

Gawas kang mayor Ampatuan, si bise Datu Kanor Ampatuan sa lungsod sa Pagatin, sa lalawigan gihapon sa Maguindanao, usa usab sa miapil ug pamusil kauban sa mga Civilian Volunteers Organization (CVO) ug mga security escort sa mga Ampatuan.

Midugang si Ebus nga sa gipahigayong checkpoint sa mga Ampatuan, nakita usab niya sila si mayor Bahnarin Ampatuan sa lungsod sa Mamasapano, kauban nila ni Datu Ulo Ampatuan, Datu Ipi Ampatuan, Datu Harris Ampatuan, Datu Moning Ampatuan ug uban pang mga miyembro sa CVO nga mga private army sa pamilyang Ampatuan.

Gibutyag ni Ebus nga si Ampatuan Jr. maoy mikapkap sa kalawasan sa pamilyang Mangudadatu ug sa ubang miyembro sa media diha sa ilang checkpoint.

Gisaysay usab ni Ebus nga una masakera ang mga biktima gipalinya pa kini ni Ampatuan Jr. unya gisugdan dayon og rakrak   ginamit ang usa ka light machine gun o ang baby armalite nga may M203 grenade launcher.

Apan sa dihang mi-kagar kini, giilisan niya dayon kini sa K3 light machine gun, matud pa ni Ebus. Nagkanayon si Ebus nga may mga biktima nga misuway og dagan aron paglikay sa tinong kamatayon apan girakrakan dayon kini sa mga miyembro sa CVO. Ang pamilyang Mangudadatu didto kini pamusila sulod sa ilang sakyanan sa duol kaayo sa sumbohan sa armas ni Ampatuan Jr. matud pa ni Ebus.

Human sa pagmasaker , si Ampatuan Jr. daling mipahawa sa maong lugar diin nagkatag na ang mga patay’ng lawas , unya human sa pipila ka minutos, naabot usab dayun ang backhoe nga maoy milubong sa mga minatay.

Samtang si Datu Kanor maoy mihatag og kamanduan sa operator sa backhoe bahin sa angay niyang buhaton ug sa dapit nga angayang lubngan sa mga biktima, dugang pa ni Ebus.

Nianang pagka hapon, matud pa ni Ebus nga gimanduan dayon sila ni Ampatuan Jr. nga mag buwagbuwag una silang tanan ug likayan una nila ang pagkita-kita samtang bag-o pa kaayo ang hitabo.

Busa gikan niadtong Nobyembre 24 hangtod 26 si Ebus didto ra maglublob sa ilang barracks sulod sa balay ni Ampatuan Jr. sa Shariff Aguak.

Samtang mipahigayon karon og follow-up operation ang kapolisan aron ilhon kun si kinsa ang tag-iya sa mga armas nga nadiskobrehan sa mga sundalo ug kapolisan ug kon nganong anaa kini mahimutang sa likod nga bahin sa Ampatuan town Hall. - Lesley Caminade (BANAT NEWS)