CEBU, Philippines - Nababha ang nawong ug dughan sa usa ka tawo nga gipusil sa usa ka security guard sa Tinguan compound sa dalan Hernan Cortes, barangay Banilad, dakbayan sa Mandaue sa miaging gabii.
Ang biktima mao si Gerry Flores, 25 , minyo nga taga barangay Tipolo, dakbayan sa Mandaue, samtang ang suspetsado mao usab si Lurence Veraces, 21, nga taga Alaska, Mambaling, dakbayan sa Sugbo.
Si PO3 Rey Manatad sa kapolisan sa Presinto 4 sa Casuntingan Police Station nga nahinabi sa Banat News miingon nga naabiriya ang motorsiklo nga giluwanan sa biktima uban sa igsoon niini.
Apan didto kini iparking sa biktima atubangan sa main gate sa Tinguan compound busa gibadlong kini sa suspetsado kay dili paparkingan ang maong agianan. Apan matud pa sa kapolisan nga misuki ang biktima ug maoy hinungdan nga nahitabo ang lalis sa duha.
Ang guwardiya nga naupsan sa katarungan uban sa kalagot ug kapungot, milanit sa iyang gitangkil nga armas de fuego ug gipikhan dayon ang dagway ug dughan sa biktima.
Human kini matumba, gidala dayon ngadto sa Vicente Sotto Memorial Medical Center sa dakbayan sa Sugbo samtang ang suspetsado dali kaayong mitahan sa iyang kaugalingon ngadto sa kapolisan. - Romeo T. Limpangog (BANAT NEWS)