TCT sa TESDA imbestigahon

CEBU, Philippines - Ipaimbistigar sa Kapitolyo ang Transfer Certificate of Title (TCT) nga giluwat ngadto sa Technical Education and Skills Development Authority (TESDA) sa may Salinas Drive, Lahug nga nahimutang sa eskina Archbishop Reyes Ave. ning siyudad sa Sugbu.

 Sumala pa ni Capitol Consultant on Information, Atty. Rory Jon Sepulveda nga ang Provincial Attorney’s office maoy misusi niini karon.

 Nasayran nga ang pagbalhin sa maong titulo gikan sa National Manpower Youth Commission ngadto sa TESDA nahimo niadtong tuig 2008 na.

 Matud pa ni Sepulveda nga nakapahibulong kaayo ang pagpagawas sa maong TCT kay niadtong miaging tuig ang Kapitolyo midemanda na sa TESDA nga bawion niini ang maong lote tungod kay dili balido ang pagdonar sa Kapitolyo niini ngadto sa NMYC.

Kini tungod kay wala kini aprobahe   sa Hunta Provincial ug dili na usab ang NMYC ang naggamit sa maong lote.

 Si Sepulveda natahap nga may labot na usab niini ang kagamhanan sa siyudad sa Sugbu tungod kay ang Notary Public sa maong TCT mao si Cebu City Councilor Atty. Gerardo Abella Carillo. - Chester Abadilla (BANAT NEWS)