CEBU, Philippines - Usa ka buhatan sa city hall sa dakbayan sa Talisay ang gikuhaan og budget ug laing duha ang gitibhangan sa budget aron makadaginot ang siyudad.
Ang gikuhaan og budget mao ang opisina sa City Planning and Development Coordinator (CPDC) ug ang gipanibhangan mao ang City Engineering ug City Agriculture.
Si Bas nga nahinabi sa Banat News nagkanayon nga niadtong buwan sa Nobiyembre niining tuiga nag-caucus ang konseho uban sa mayor sa siyudad ug nagkauyon sila niini.
Ang CPDC gikuhaan sa P150,000 nga travelling allowance ug P150,000 nga training allowance ug P200,000 alang sa City Land Use Program (CLUP) nga ubos sa CPDC.
Samtang ang budget sa City Agriculture nga P400,000 sa travelling allowance gihimo nalang kining P200,000 ug ang P550,000 nga training allowance gihimong P250,000.
Ang city engineering nga may travelling allowance nga P300,000 gihimo karong P100,000, ug ang training allowance niini nga P150,000 nahimo nang P100,000.
Gumikan niini makadaginot na ang dakbayan og P1.2 milyones matud pa ni Bas.
Samtang ang hepe sa CPDC nga si Christine Homez mibutyag sa Banat News nga nakalitan sila niini kay silang mga apektadong buhatan ipatawag sa konseho kalabot niini.
Matud ni Homez nga bisan og gikaltasan ang ilang budget gipaningkamutan gihapon nila nga dili mabalda ang ilang mga trabaho sa pagpahigayon sa mga proyekto ug programa sa siyudad. (BANATNEWS)