Drayber sa traysikol gipusil tipi

CEBU, Philippines - Namatay ang usa ka drayber sa traysikol human kini pusila sa tulo ka wala hiilhing lalaki nga nagsakay og motorsiklo didto sa barangay Maslog, dakbayan sa Danao, niadtong Domingo sa hapon.

Ang biktima mao si Hermes Verano, 33, minyo, nga taga sitio Santo Niño sa barangay Maslog sa maong dakbayan .

Matud pa ni SPO1 Jose Salingua sa Danao Police Station nga namasahero ang biktima dihang giatangan kini sa usa sa tulo nga mga kriminal ug sa iyang paghunong gidul-itan pagpusil ang iyang ulo.

Si SPO1 Salingua miingon nga mitulilik ang traysikol nga gimaneho sa biktima dihang naigo kini ug nakasinggit sa kalisang ang tulo ka pasahero niining babaye.

Ang mga lumolupyo sa maong dapit nga nakamatikod sa maong pagpamusil miingon nga ang tulo ka mga kriminal pulos mga batan-on ug kasarangan lamang ang gidak-on sa ilang panglawas.

Matud pa ni SPO1 Sangua nga ang tulo ka babaye nga pasahero naglisod usab sa paghulagway sa mga panagway sa mga mamumuno.

Sa pagkakaron padayon pang gipangita sa kapolisan ang mga mamumuno.

Mga kandidato sa oposisyon sa 5th district nanumpa na

Nanumpa na ang mga kandidato sa opposition sa ika-limang distrito sa Sugbo niadtong Domingo sa buntag.

Ang maong mga kandidato gipangulohan nila ni Pwersa ng Masang Pilipino (PMP)campaign manager Ernesto Maceda, senatoriable Rodulfo Ompong Plaza ug ni Mayor Richie Wagas sa Compostela ug mga kaubanan didto sa gym sa maong lungsod.

Ang gituboy nga kandidato sa local nga piniliay mao sila si reelectionist Mayor Richie Wagas ug mga kaubanan, Tudela Mayor Baquerfo ug iyang mga konsehales ug lakip sa giisa mao ang hulagway ni former mayor Gilbert Wagas nga atoa sa Muntinlupa karon, nga kandidato sa pagka- kongresista sa ika-limang distrito.            

Si Wagas bisan tua sa Muntinlupa mipalanog sa iyang tingog sa katawhan pinaagi sa telepono ug iyang giinsister nga illegal ang pagkasikop kaniya tungod kay wala panumbalinga ang iyang petition aron malibkas ang warrant of arrest batok kaniya.

Matud pa ni Wagas nga usa siya ka biktima sa political harassment sa mga Durano.

Ang Sugboanong kongresista sa Agusan Del Sur Rodulfo Ompong Plaza mipabati usab sa iyang pagsuporta kang Wagas.

Si Plaza og Maceda miawhag sa katawhan nga motabang pagbantay sa election aron nga dili mabiktima sa tikas ug dili angay magpadala sa mga hulga mugna sa mga warlords nga maoy mikontrolar sa election sulod na sa milabay’ng pila ka dekada.

Si Plaza ug Maceda nagtuo nga kun adunay warlord nga Ampatuan clan sa Maguindanao nga nanag-iya og dagkong mansiyon ug mga luhong sakyanan, dinhi sa Sugbo aduna usab busa giawhag niya ang katawhan nga magmabinantayon sa pagpili og kandidato karong umaabot nga election. (Bong Soriano)    (BANATNEWS)