Maguindanao tandugon gihapon-Tommy

CEBU, Philippines - Nagpabilin gihapon ang risgo sa probinsya sa Maguindanao karon bisan kung gilibkas na ang deklarasyon sa Martial Law (ML)sa nahisgutang lalawigan. Kini maoy gipadayag ni Cebu City Mayor Tomas Osmeña nga usa sa pipila ka mga opisyal sa siyudad nga mipabor sa maong deklarasyon.

Hinoon daan nang gipaabot sa mayor nga dili gyud magdugay ang maong balaod military ug libkason gayud kini ni presidente Gloria Macapagal Arroyo sukad kini ipatuman sugod   niadtong Disyembre 4.

Kini tungod sa ubay-ubay nga misupak ug misaway sa nahisgutang deklarasyon nga gipasikad sa Proclamation Number 1959 sa presidente.

Apan nabalaka si Osmeña nga moulbo ang laing kagubot sa nahisgutang lalawigan tungod sa iyang pagtuo nga manimawos ang kabanay sa mga biktima sa masaker. Labing minus 57 ka kinabuhi ang nakalas niadtong miaging buwan didto sa Ampatuan, Maguindanao dihang gipamusil kini sa armadong mga tawo. Ang mga biktima nga nag-convoy sa pagpanguna ni Genalyn Mangudadatu , asawa bi Vice Mayor Toto Mangudadatu sa lungsod sa Buluan, aron mosang-at sa Certificate of Candidacy (COC) sa iyang bana nga magpapili sa pagka-gobernador sa Maguindanao.

Apan ang grupo ni Genalyn uban sa mga sakop sa Media nga mo-cover unta sa filing sa COC, giatangan sa armadong mga tawo ug gipamusil.

Gipasanginlang responsable sa nahisgutang linuog nga krimen mao ang pamilyang Ampatuan nga karibal sa mga Mangudadatu sa politika. Tungod sa pagpaubos sa Maguindanao sa ML, gipanakmit ang mga armas sa banay'ng Ampatuan ug gipanakop ang mga suspetsado.

Apan nagtuo si Mayor Osmeña nga armado usab ang ubang kabanay sa mga biktima ug kini maoy iyang gikahadlukan nga manimalos. – BANAT NEWS