Jailbreak sa Basilan 2 patay, 31 nakapoga

CEBU, Philippines - Duha ang namatay sa pinusilay tali sa kapolisan ug sa mga suspetsadong grupo sa mga rebelde kinsa miatake sa prisohan sa dakbayan sa Isabela, lalawigan sa Basilan ug mipapoga sa 31 ka mga binilanggo kagahapon sa kaadlawon.

Base sa taho gikan sa Basilan Provincial Police Office, nasayran nga ang maong pangatake nahitabo sa mga ala 1:45 sa kaadlawon dihang may 30 ka armadong mga tawo ang kalit lang mihugpa sa prisohan sa Isabela .

Bisan og nakalitan sa maong pangatake, nakahimo pa sa pagpakigsangka ang kapolisan batok sa mga armadong mga tawo nga gisuspetsahang sakop sa Moro Islamic Liberation Front (MILF) nga misangpot sa kamatayon sa usa ka jail guard ug sa usa ka mga nangatake.

Si Defense Secretary Norberto Gonzales Jr.dihadiha miadto dayon sa maong lugar ug nakigtagbo sa mga kadagkuan sa militar ug kapolisan sa maong lalawigan.

Pipila sa nakapoga mao ang mga kumander sa MILF nga si Dan Laksaw ug Kamsa Limaya nga nagbase sa lungsod sa Al-Barka sa Basilan.

Human sa maong jailbreak, gipahigayon dayon sa kapolisan ug militar ang mga checkpoint sa maong lugar.

Sumala sa kapolisan sa Basilan nga sila si Laksaw ug Limaya pulos mga banggiitang piniriso nga mga sakop sa MILF ubos sa 114th base command niini nga nagbase sa barangay Gunata, lungsod sa Al-Barka, sa Basilan.

Sa pagkakaron padayon pang gigukod sa kasundalohan ug kapolisan ang mga nangatake. Samtang si Vice Governor Rasheed Sakalahul sa Basilan nagkanayon nga ila pang giimbistigar karon ang mga guwardiyang polis sa prisohan sa Isabela kung nganong dali nga naablihan sa armadong grupo ang pultahan sa prisohan ug nakapagawas sa 31 ka mga piniriso. – BANAT NEWS