CEBU, Philippines - Grabeng pagkaangol naangkon sa usa ka bombero sa dakbayan sa Sugbo human masungag sa naghaguros nga sakyanan ang motorsiklo nga iyang giluwanan ala-una pasado ang takna sa miaging kaadlawon ug nadasmag sa lamppost atubangan sa Cebu International Convention Center (CICC) sa Mandaue reclamation area.
Ang biktima mao si fire officer Novo Erana, 36, taga Bacayan, dakbayan sa Sugbo kinsa nagsakay sa iyang Honda nga motorsiklo ug nagdagan kini gikan sa dakbayan sa Sugbo.
Ang Honda City nga nagtangag sa plakang YGK 853 nga gimaneho ni Chulk Ruiz, 21, ulitawo nga taga purok Tambis, barangay Sambag 1, dakbayan sa Sugbo gikasugat sa bombero.
Si PO1 Dante Flores, field traffic investigator sa Traffic Section sa Mandaue City Police Office sa dihang nahinabi sa Banat News miingon nga gikan sa unang Mactan-Mandaue Bridge ang Honda City.
Si PO1 Flores miingon nga mipabulhot sa pagpadagan ang sakyanan nga gimaneho ni Ruiz apan mikawat kini sa pagliko sa pikas lane sa eskina Plaridel ug Ouano Avenue atubangan sa Mandaue City Hospital sa sitio Tribunal ug napunggit ang motorsiklo nga giluwanan ni Erana.
Nalamba sa karsada ang motorsiklo uban sa bombero nga maoy nakaingon sa grabeng pagkaangol niini.
Si PO1 Flores nagkanayon nga ang kapolisan migukod sa Honda City nga mipasirit og padagan aron mosibat human sa insidente.
Apan sa pag-abot atubangan sa CICC, nabangga ngadto sa garbage bin ang Honda City ug milahos pagkabangga sa lamppost hinungdan sa pagkatumba niini. – BANAT NEWS