CEBU, Philippines - Wala makaipsot ang usa ka giingong bayot nga bugaw human kini gisikop sa mga sakop sa kapolisan sa Station 5 sa Mandaue City Police Office didto sa AC Cortes Avenue dakbayan sa Mandaue sa milabay’ng gabii.
Ang nasikop mao si Jasper Garcia, 32, (usa ka mahuyang ) residente sa sitio Bilduhan, barangay Umapad, dakbayan sa Mandaue.
Matud pa ni Insp. Wilson Abot, ang Deputy Chief sa Station 5 sa MCPO nga dugay na nilang gipanid-an si Garcia human kini gitumbok nga namaligya og mga babaye diin ang uban mga minor de edad ngadto sa mga lalaking kustomer ug mga langyaw.
Sumala pang Abot mokantidad ngadto sa 1,500 pesos pataas ang presyo sa mga babayeng makighilawas ug mas dako og presyo kun kini usa ka minor de edad sumala pa sa reklamo sa mga sakop sa International Justice Management.
Gumikan niini uban sa mga sakop sa International Justice Management kon IJM ug Department of Social Welfare and Development, si Sr. Insp. Alfredo Ortiz, hepe sa Station 5 sa MCPO milusad dayon og operasyon sa pagsikop ni Garcia.
Atol sa pagkasikop sa suspetsado dunay unom ka mga babayeng gidala nga buot unta niining ‘ibaligya’ sa nagpakaaron-ingnong kustomer nga mga polis ug dihang gihimo ang transaksyon gidiretso og dakop si Garcia.
Ang maong mga babaye anaa na kaaron sa kustodiya sa DSWD samtang si Garcia kasamtangang gibalhog sa detention cell sa Station 5 samtang giandam ang kasong ipasaka nga kalapasan sa Akta Republika 9208. (Bong Soriano ug Romeo T. Limpangog) (BANATNEWS)