CEBU, Philippines - Giaprobahan sa konseho sa dakbayan sa Lapulapu ang balor P816 mil nga gahin alang sa bag-ong mga armas sa Special Weapons and Tactics sa dakbayan sa Lapulapu bisan paman sa pagsupak sa oposisyon.
Atol sa ilang regular session sa konseho sa dakbayan sa Lapulapu gitugotan pinaagi sa resolusyon sa Konseho og katungod ang City Treasurer, Budget Officer ug City Accountant sa pag-withdraw og salapi gikan sa Philippine Amusement Gaming Corporation funds balor P816 mil.
Kini aron gamiton sa pagpalit og mga bag-ong armas ug kagamitan sa mga sakop sa SWAT sa dakbayan tungod kay sila maoy giisip nga elite unit sa pagpatunhay sa kahapsay sa maong dapit.
Una niini, si Konsehal Junard “Ahong” Chan mikwestyon sa maong resolution gumikan sa mga nakitang kakulangon sa detalye sa mga matang ug klase sa armas nga buot paliton ug ang mga armas nga giingong gubaon nga angayan nang hulipan.
Lakip sa gikwestyon ni Chan mao ang wala pagbutang og dugang suportang dokumento sama sa canvass sheet sa mga tindahang mo-supply niini ingon man ang kantidad sa matag armas.
Si Chan nagkanayon nga balor lamang og P478 mil ang kantidad sa 25 ka mga kalibre .45 nga armas ug mipadayag nga overprice na kun basehan ang naaprubahang P 816 mil.
Apan si Francisco Sarsalon nga Consultant sa SWAT team sa dakbayan sa Lapulapu nga mitambong sa maong session mipasabot nga ang kantidad nga P478 sa armas palang kini nga paliton, ug ang nahibilin maoy gamiton pagpalit sa mga bala.
Gumikan niini wala nay mahimo si Chan dihang giaprubahan ang maong resolusyon. (Bong Soriano) (BANATNEWS)