CEBU, Philippines - Gidawat na ni Kapitan Celiapo Cabuenas sa barangay Lagtang, dakbayan sa Talisay ang tanyag nga siya’y ihulip kang Kapitan Josefina Conceal aron makompleto ang line up sa administrasyon.
Kahinumdoman nga si Conceal nakahukom nga mobakwi sa iyang Certificate of Candidacy (COC) sa pagdagan isip konsehal sa dakbayan sa Talisay tungod sa kakulian sa panglawas.
Si Cabuenas usa sa mga gitanyagan sa administrasyon nga mohulip kang Conceal apan mibalibad kini kay nag-agad pa siya sa desisyon sa iyang pamilya ug sa iyang igsoong Mongha.
Apan niadtong Huwebes midesisyon siya nga dawaton na niya ang tanyag ug iya nang gipasabot ang iyang pamilya niini samtang gipaabot nalang niya ang desisyon sa iyang igsoon nga Mongha.
Si Cabuenas mibutyag usab nga niining iyang hukom dili na siya moapil sa mga kapitan nga mi-endosar kang kanhi bise Mayor Aberdovey sa pagka- Bise Mayor nga kandidato sa Talisay.
Kahinumdoman nga si Cabuenas usa sa mga 17 ka kapitan sa Talisay kinsa mi-endosar kang Belleza nga maoy mahimong running mate ni Mayor Socrates Fernandez.
Apan kalit siyang misukahi human sila makig-atubang kang Kongresista Eduardo Gullas sa unang distrito sa lalawigan sa Sugbo.
Matud niya nga si Belleza sa sayo pa mibalibad sa tanyag ni Gullas nga palansaron sa pagka-bise mayor ni Mayor Socrates Fernandez.
Maoy hinungdan nga si acting vice mayor Alan Bucao nalang ang gipili sa Kongresista nga mo-runningmate kang Fernandez. (Brenda D. Batuto) (BANATNEWS)