CEBU, Philippines - Gamay ra ang mga magtutudlo sa pampublikong tunghaan ang makasilbi sa eleksiyon sa 2010.
Sumala pa ni Department of Education regional director Recarido Borgonia nga daghan sa mga magtutudlo karon ang may mga kadugo ug mga paryente nga mga kandidato sa umaabot nga eleksiyon.
Kini tungod kay sagad sa mga magtutudlo karon sa probinsiya sa Sugbo na-assign sa ilang lugar diin sila nagpuyo mismo.
Matud pa ni Borgonia nga aron paglikay nga makasohan ang mga magtutudlo dili kini pugson sa pagsilbi sa umaabot nga eleksiyon.
Si Borgonia miingon usab nga ilang tumanon ang lagda sa Commission on Election nga walay public school teacher nga magsilbing Board of Election Inspector (BEI) sa presidential election nga may paryenteng kandidato sa lokal nga posisyon aron malikayan ang pagduda sa pagkabayas.
Tungod niini, si Borgonia nagkanayon nga ilang hashasan pag-ayo ang mga magtutudlo nga moalagad sa eleksiyon.
Usa sa mga paagi mao nga mapaubos kini sa subsob nga training ug seminar sa Comelec ilabi na nga ang automated na ang piniliay sa sunod tuig. (Chester Abadilla) (BANATNEWS)