4 ka balay kahilayan iparonda sa caib

CEBU, Philippines - Upat ka balay kahilayan iparonda sa Cebu City Anti-Indecency Board (CAIB) ngadto sa kapolisan sulod niining semanaha.

Kini maoy gibutyag ni CAIB chairman Rene Josef Bullecer, tungod usab sa ubay-ubay nang reklamo nga iyang nadawat.

Ang gireklamong mga establisamento naglakip sa usa ka gay bar, massage parlor ug laing karaoke bar nga giingong nakalapas sa Anti-Indecency Ordinance sa dakbayan sa Sugbo.

Gikataho nga ang massage parlor gihimong front sa prostitusyon samtang ang ubang balay kahilayan nagpasundayag og malaw-ay’ng talan-awon.

Gani miingon si Bullecer nga labing minus tulo ka konsehal sa siyudad nakadawat usab og susamang reklamo nga giduso sa iyang buhatan.

Sila si Konsehal Arsenio Pacaña, Sylvan Jakosalem ug Augustus Pe Jr., mao ang pipila ka konsehal nga ginganlan ni Bullecer nga nakadawat usab og mga reklamo.

Miingon ang CAIB chairman nga dili na nila mahimong palabyon ug pasagdan ang mga reklamo nga ilang nadawat.

Nakanayon si Bullecer nga siya mismo maoy mangita og kwarta nga gamiton sa operasyon sa kapolisan tungod kay wala pa mogawas ang ilang gahin.

“By hook or by crook, basta ma-proven nga naa gyud nang reklamo, ato dayon nang padasmagan sa atong kapolisan,” sumala ni Bullecer.

Sa pikas bahin, gipasigarbo sa CAIB chairman nga wala nay mga cubicle ang mga internet café sa siyudad tungod sa ilang hugot nga pag-monitor niini.

Dugang ni Bullecer nga dili na usab makita sa dakbayan ang ilang gi-ban nga mga magazine sama sa Maxi, Cosmopolitan ug FHM.

Giangkon hinuon sa CAIB chairman nga sila maglisod pagsumpo sa cybersex tungod kay kini giingong himuon sulod na sa mga panimalay. (Elly Bolonos)     (BANATNEWS)