Martial Law gilibkas na

CEBU, Philippines - Ang Malacañang kagahapon mipahibalo nga ang Martial Law sa Maguindanao gilibkas ni Pres. Gloria Macapagal-Arroyo sugod kagahapon, Sabado sa alas 9 sa gabii.

Sa usa ka press briefing nga gipahigayon sa Malacañang kagahapon, si Executive Secretary Eduardo Ermita miingon nga bisan wala nay martial law, magpabilin gihapon ubos sa ‘state of emergency’ ang lalawigan sa Maguindanao.

Sa sayo pa, si Press Secretary Cerge Remonde nagkanayon nga libkason lamang sa Malacañang ang martial law kun ang mga ground commander sa Armed Forces of the Philippines ug Philippine National Police makasota nga ang unom ka kondisyon paglibkas niini makab-ot. Kini mao ang ‘rebelyon’ sa Maguindanao masumpo, ang mga suspetsado sa masaker niadtong Nobiyembre 23 madakpan, mga kaso mapasaka batok sa mga mamumuno, ma-secure ang mga testigos, mabalik sa gobyerno ang pamunoan sa Maguindanao ug ang mga ilegal nga armadong grupo ma-disarmahan.

Si Ermita nagkanayon nga ang maong unom ka kondisyon nakab-ot ug nahimo na sa kagamhanan.

Si Ermita mipahibalo sa paglibkas sa martial law human sa panagtigum sa National Security Council sa Malacañang uban kang Arroyo kinsa bag-ohay lang migawas gikan sa St. Lukes Hospital.

Ang security cluster sa kabinete ni Arroyo mirekomendar sa paglibkas sa martial law base usab sa report nga gisumiter sa PNP, AFP ug DOJ.

Base sa report, sumala pa ni Ermita nga moabot og 529 ka tawo nga gilambigit sa gialegar nga rebelyon, apil na ang mga lider ug mga supporter niini ubos na sa kustodiya sa kagamhanan.

Sumala pa ni Ermita nga 24 ka mga tawo, apil na ang lima ka sakop sa pamilyang Ampatuan pinanguluhan ni Gobernador Andal Ampatuan Sr. sa Maguindanao gipasakaan og kasong rebelyon, ug 638 ka kasong rebelyon giduso sa PNP ngadto sa DOJ.

Ang mga posisyon sa mga ‘rebelde’ sa mga lungsod sa Ampatuan, Rajah Buayan, Sultan Sabarongis, Datu Unsay, Mamasapano, Shariff Aguak ug Talayan ma-clear na sa mga awtoridad.

Ang Kongreso mopadayon unta sa deliberasyon ug mopadayon unta sa botasyon sa pagbukas og balik sa session ugma (Lunes), apan gipanglantaw nga dili na kini mahitabo tungod sa paglibkas sa martial law.

Si Senador Manuel “Mar” Roxas III kinsa usa sa miboto nga ilibkas sa Kongreso ang martial law nagkanayon nga nakat-on ra sa kasaypanan ang pamunoang Arroyo pagproklamar og martial law sa Maguindanao.

“Mali ang imposisyon ng martial law sa Maguindanao. Paninindigan ng Partido Liberal, labag sa Konstitusyon ang martial law na ito. Inimagine lang nila itong sinasabi nilang ‘rebelyon’, matud ni Roxas.

Si Pres. Arroyo miisyu og Proclamation No. 1959 duha ka semana human mahitabo ang linuog nga pagpatay sa 57 ka mga tawo pinanguluhan sa pamilyang Mangudadatu sa Shariff Aguak, Maguindanao, apil na ang 34 ka mga sakop sa media niadtong Nobiyembre 23. (BANATNEWS)