Urban poor leader gipusil patay

CEBU, Philippines - Patay ang usa ka giingong urban poor leader ug supporter ni incumbent Mayor Jonas Cortes human gipusil sa duha ka wala mailhing mga tawong nagsakay og pula nga motorsiklo alas-10 pasado ang takna kagahapon sa buntag sa dalan Batiller, sitio Bildohan sa barangay Umapad, dakbayan sa Mandaue.

Ang namatay giilang si Greg Genon, ug kasamtangang nagpuyo sa nahisgutang dapit ug lider sa Sitio Bildohan Homeowners Urban Poor Association ingon man tigpaluyo ni Cortes sa maong lugar.

Si SPO1 Lino Baylosis sa kapolisan sa Presinto 5 sa Opao Police Station nga nahinabi sa Banat News miingon nga naglakaw ang biktima gikan sa iyang panimalay ug gisundan kini sa duha ka wala hiilhing lalaki nga nagsakay og pulang motorsiklo.

Dihang nakaduol ang motorsiklo sa luyong bahin sa biktima kalit nga milanog ang buto-buto sa armas ug diha-diha nahagba ang biktima, sumala pa sa kapolisan posibleng ang backrider niini ang mipusil kang Genon.Human sa pagpusil daling mipahilayo ang duha sa maong lugar samtang ang biktima nga nakabaton og samad pinusilan sa ulo ug kalawasan namatay diha-diha ug wala na madala pa sa tambalanan.

Si Baylosis miingon nga walay nakasaksi atol sa maong insidente gawas lamang sa mga tawong nakabati sa lanog nga buto sa armas ug ang lanog nga andar sa makina sa motorsiklo sa dayon nilang ikyas. Tulo ka basiyo sa kalibre .45 nga bala ug usa ka slug ang napalgan diha sa crime scene. Usa sa gisusing posibleng motibo sa pagpusil sa biktima mao ang kalambigitan sa pagka-lider niini sa urban poor diha sa ilang lugar nga kaniadto naigo sa dakong sunog, ug ang pagka-suporter niini sa mayor.

Si Genon kansang balay naapil sa sunog sa miaging bulan maoy usa sa mga nakadawat sa hinabang gikan sa kagamhanan.

Si Cortes mimando sa kapolisan sa Mandaue nga subayon ang tanang anggulo nga naglakip sa personal ug sa pagka-lider niini sa urban poor ug ang politikanhong motibo.  – BANAT NEWS