BPPO may bag-ong hepe karong Dec. 15

CEBU, Philippines - May bag-o nang hepe ang kapulisan sa probinsya sa Bohol sugod karong Decembre 15 nga maoy mohulip kang Sr. Supt. Eduardo Ingking ang provincial director sa Bohol Provincial Police Office (BPPO).

Si Sr. Supt. Anthony Obeinsa ang hepe sa Personnel Division sa Police Regional Office (PRO-7) maoy gitudlo sa maong katungdanan base sa kamandoan ni Chief Supt. Lani-O Nerez, Regional Director sa Police Regional Office (PRO)7.

Si Nerez mipasabot nga ang paghulip kang Sr. Supt. Ingking gipasubay sa naandang proseso sa Philippine National Police (PNP) nga kadtong mga City ug Provincial director sa kapulisan nga mokapin na sa duha ka tuig sa ilang katungdanan sa usa ka lugar, kinahanglang hulipan aron mahataga’g kahigayunan ang ubang mga official sa kapulisan nga makapahimulos usab og promosyon.

Si Chief Supt. Nerez maoy mangulo sa kalihukan atol sa pormal nga turn-over of command nila ni Sr. Supt. Ingking ug Sr. Supt. Obiensa karong Desiyembre 15.

Nunot niini naapektohan usab ang ubang mga tag-as nga official sa PRO-7 sa ilang gihuptang posisyon sanglit ang uban niini gipang-relibohan usab.

Ang opisyal nga relibohan naglangkob nila ni Sr. Supt. Vicente Loot, gikan sa pagka-chief of staff ibalhin isip Deputy Regional Director for Operations (DRDO), samtang si Sr. Supt. Ingking mao nay bag-ong chief of staff, si Sr. Supt. Marcelo Garbo nga gikan sa DRDO mao nay bag-ong Deputy Regional Director for Administration (DRDA).

Samtang ang Public Information Officer (PIO) sa PRO-7 nga si Supt. Ernesto Agas, ibalhin usab isip bag-ong hepe sa personnel division nga gibiyaan ni Sr. Supt. Obiensa.(Guam P. Logroño).   (BANATNEWS)