3 ka tseke nga balor og P284 mil ipresentar sa Ombudsman

CEBU, Philippines - Tulo ka mga tseke nga nagkantidad og himabaw sa P284 mil nga giingong giluwat ni Mayor Richie Wagas sa lungsod sa Compostela ug ni municipal treasurer Lorenzo Almodiel maoy ipresentar sa mga opisyal sa maong lungsod ngadto sa buhatan sa Visayas Ombudsman agi’g ebidensya sa giingong anomalosong buhat sa mayor ug sa tresurero sa lungsod.

Mao kini gibutyag ni Bise Mayor Joel Quinio sa Compostela kinsa mibutyag sa Banat News nga ang mga tseke numero 0000412643, 0000412644, ug 0000412645 parehong nagkantidad matag usa ka tseke og tag P94,642.85.

Gihimo ni Quinio ang pagpatin-aw niini aron sa pagpasabot nga ang katibuk-ang kantidad sa tulo ka mga tseke mikabat sa P283,928.55 ug dili kay himabaw rang P95 mil.

Matud pa ni Quinio nga ang maong mga ebidensya maoy ipataban nila sa ilang resolusyon nga nag-awhag sa Ombudsman sa pagparelibo kang Almodiel gikan sa iyang katungdanan tungod sa dakong kalapasan nga nahimo niini dihang nagkasabot sila og si Mayor Wagas nga iluwat ang nahisgutang mga tseke nga wala mag-agi sa buhatan ni municipal accountant Silvia Malacad. (Darrel A. Carumba)    (BANATNEWS)