CEBU, Philippines - Gilugos sa minor de edad nga drayber sa traysikad ang 18-anyos nga dalagang iyang pasahero nga nagpahatud gikan mitambong og birthday party apan imbes nga balay sa dalaga sa kalibunan nga bahin sa barangay Mahawak lungsod sa Medillen hinuon niya kini gidala ug gilugos niadtong Lunes sa alas 11:00 sa gabii.Ang biktima (ngan gipugngan) nga molupyo sa nahisgutang barangay mitug-an nga gilugos siya sa 17- anyos nga drayber sa traysikad nga residente ra usab sa maong dapit.
Ang biktima nga nakahinabi sa Banat News pinaagi sa telepono mitug-an nga gikan siyang mitambong sa birthday party sa iyang ig-agaw sa barangay Kawit sa wala pa ang hitabo ug nianang pagka alas 11:00 na sa gabii mipauli siya ug misakay sa traysikad sa suspek.
Apan matod sa biktima daku nalang ang iyang kahibulong nga gipahunong og kalit sa suspek ang traysikad pag-abot nila sa kalibunan ug dayun gitionan siya niini og kutsilyo sa liog dayon gihulgang patyon kun mosinggit.Pagkahuman niini gialsa siya ug gidala sa sulod nga bahin sa kalibunan bisan pa sa iyang pagpakiluoy ug didto gilugos siya niini.
Matud sa biktima human molampos ang suspek sa yawan-ong buhat wala siya palakwa niini ug dihang usban na usab unta siya paglugos napatiran niya ang kinatawo sa suspek hinungdan nga nakadagan siya palayo bisan walay sapot.
Iyaha dayung gisumbong sa iyang ginikanan ang hitabo ug midala kaniya sa kapolisan hinungdan sa pagkasikop sa kapolisan sa suspek kinsa daw sa wala ray nahitabo nga nagpadayon sa iyang pagpamasahero diha sa barangay Kawit.
Ang suspek nagtingkagol na karun sa detention cell samtang nagpaabot sa tukmang kaso nga ipasaka batok niya samtang ang biktima gidala pa sa Vicente Sotto Memorial Medical Center VSMMC alang sa eksaminasyon. (BANATNEWS)