CEBU, Philippines - Gipasigarbo ni Cebu City Mayor Tomas Osmeña nga mas bongga ang grand finale sa umaabot nga Sinulog 2010 karong sunod buwan tungod kay kini gastuhan og P2.5 milyones alang ra sa presentasyon nga salmutan sa 500 ka mga performers.
Lakip sa ginganlan ni Osmeña nga imbitahon sa grand finale mao sila si Pilita Corales, Dulce ug ubang local performers nga nisikat sa laing kanasuran.
Giimbitar usab ang singer nga si Dandin Ranillo nga igsuon ni Mat Ranillo III ug uyuoan sa kontrobersyal nga artistang si Krista Ranillo. Si Dandin mao ang Sugbuanong niawit sa sikat nga ‘Cebu Cebu’ ingon man sa Sinulog theme song nga gamiton matag Sinulog festival.
Gawas sa P2.5 milyones mohatag usab og laing P10 milyones ang city government alang sa premyo sa festival.
Gibutyag sa executive director sa Sinulog nga si Ricky Ballesteros nga moabot sa P25 milyones ang gastuhon pagpahigayon sa Sinulog 2010 ug P11 milyones niini alang sa premyo ug sa uban pang mga special awards.
Sa kasamtangan, duna nay pipila ka mga out-of-town contingents nga mikompirmar nga musalmot sa ika-30 na nga Sinulog Festival sunod buwan.
Miingon si Ballesteros nga pipila niini mao ang Santa Catalina sa Negros Oriental, San Carlos City, Negros Occidental, Placer sa Masbate, Tangub City ug Siargao sa Surigao ug daghan pa ang interesadong musalmot lakip na ang mga first timers. Kini sama sa Davao City, Zamboanga City ingon man ang Larena sa lalawigan sa Siquijor ug ang pagbalik og salmot sa contingents sama sa Camiguin nga mipahuway og tulo ka tuig. (BANATNEWS)