Polis sa Pardo patubagon sa Ombudsman

CEBU, Philippines - Gipatubag na sa Deputy Ombudsman for the Military and Other Law Enforcement Offices ang   polis sa Pardo, sa giatubang niining kaso nga attempted murder nga gipasaka sa Commission on Human Right kun CHR-7 tungod sa pagsulay sa pagpusil-patay sa usa ka giingong badlungon.

Si Ombudsman for the Military director Eulogio Cecilio nimando kang SPO4 Sanrico Jolejole pagtubag sa maong kaso may kalambigitan sa pagsulay og pagpusil-patay sa usa ka Reynaldo Sabellano, nga residente sa 13-A J. Tabora St., sa Pardo, Cebu City niadtong Enero 11, 2007.

Si Cecilio nagkanayon sa iyang usa ka pahinang kamanduan nga mihatag og napulo ka adlaw kang Jolejole gikan sa pagdawat sa maong kamanduan sa pagdangat sa iyang tubag.

Matud pa ni Cecilio nga kun mapakyas sa pagpadangat og counter affidavit isipon nilang gi-waive niini ang katungod sa pagtubag sa maong kaso nga ubos na karon sa preliminary investigation.

Usa sa pipila ka mga adlaw’ng gikatahong gisunod-sunod siya ni Jolejole nahitabo niadtong Oktobre 2007 dihang siya natulog sa ilang balay nakabati siya og sunudsunod nga ‘pitik’ sa mikagar nga armas ug sa iyang pagmata nakita niya ang duha ka mga tawong nagtabon sa ilang nawong nagtion pa og armas tumong sa iyang ulo ug mikalit og dagan dihang misinggit siya og tabang.

Matud pa niini nakahigayon pa siya pagsusi sa maong mga lalaki ug dihang gitangtang sa usa ang takuban niya kining si Jolejole.

Sa Enero 11, 2007, si Sabellano kuyog gihapon ni Tabora ug laing duha ka mga kaubanan nag-atang og PUJ nga masakyan sa may Green fields Subdivision sa may Pardo, ug kalit lamang mibutho si Jolejole sakay gihapon sa iyang motorsiklo uban ang iyang police assets nga nagsakay usab og motor.

Matud pa niya nga kalit siya gipusil ni Jolejole ug mga kaubanan niini makadaghang higayon apan nag-ekis-ekis siya sa pagdagan apan naigo gihapon sa tiil ug swerteng nakatago siya sa lapukong katangkongan.

Ang pamahayag ni Sabellano gisuportahan usab kini ni Tabora ug nila ni Claudio Agan ug Jonathan Villegas.

Si Director Alonso sa CHR-7 wala mihatag og gibug-aton sa mga panghimakak sa polis tungod sa dili matuis nga positibong pag-ila kaniya sa biktima.

Ang maong kaso nahandos sa Cebu City Prosecutor Office apan human sa pipila ka bulan nga pagtuon gitunol ra usab kini ngadto sa Ombudsman for the Military.

Nianang mga tuiga misiaw og maayo ang extrajudicial killings dinhi sa dakbayan ug dul-an 190 ka mga ex-convicts ug may mga criminal records ang gipamatay.

Apan bisan usa wala pay nasulbad niining mga kasoha gumikan sa kawalay interes sa mga kabanay sa mga biktima ug sa pagdudang mga polis ra usab ang mga mihimo niini.   (Chester Abadilla)    (BANATNEWS)