Espina uyon sa martial law

CEBU, Philippines - Suportado ni congressional aspirant Rene 'r.e,' Espina Jr. sa ikaunom nga distrito ang deklarasyon ni Presidente Gloria Macapagal Arroyo nga martial law sa Maguindanao.

Matud ni Espina kagahapon nga makatarunganon ug gikinahanglan gyud ang maong aksyon aron mapugngan ang duguong panaggubat sa pamilyang Ampatuan ug Mangudadatu tungod sa nahitabong masaker nga mikalas og 57 ka mga tawo niadtong Nobiyembre 23 sa Shariff Aguak Maguindanao.

“I'm fully supportive with martial law in Maguindanao because it is already a necessity. The declaration of martial law in that area will provide a breathing spell between warring factions, in other words, it allow them sufficient time to calm down and prevent the escalation of wanton massacre through “rido,” nagkanayon si Espina sa mga tigbalita.

Si Presidente Gloria Macapagal Arroyo mipagawas sa Proclamation 1959 gumikan sa mga armadong mga gituohang suporter sa mga Ampatuan nga giingong mipadayag og pagsukol sa awtoridad kun panakpon ang ilang lider.

Giangkon hinuon niyang temporaryo ra ang kalinaw karon sa maong lalawigan bunga sa martial law sanglit human kini malibkas mabuhi og balik ang panagdumot sa duha ka pamilya tungod kay kabahin na kini sa ilang kultura.

Si Espina usa sa mga aktibong aktibista panahon sa rehimeng Marcos, miangkong tungod sa martial law kaniadto nausik ang kapin sa 20 ka tuig sa iyang pagkabatan-on tungod kay napugos siya og biya sa nasud ug nabalik lang niadtong Edsa One.

Apan dako ang iyang pagsalig nga di mokatap sa tibuok nasud ang martial law sanglit wala pa siya’y nakitang tilimad-on susama kaniadto (martial law ni Marcos) sa nagkadaiyang lugar sa Pilipinas nga grabeng pag-alsa sa rebelyon, kagubot ug uban pa nga mga rekisitos aron madeklarar ang martial law sa tibuok Pilipinas. (Rey Pasaporte)   (BANATNEWS)