Dinakpan gipangayoan og P5 mil sa polis

CEBU, Philippines - Mga sakop sa Carbon Police Station gireklamo sa usa ka concerned citizen sa dySS Super Radyo human giingong mi-demanda og kantidad bugti nga buhian ang usa ka hubog nga nadakpan tungod sa pagbinastos.

Usa ka Froilan Quiachon, 45, taga barangay Poblacion dakbayan sa Talisay ang gidakop niadtong Sabado sa alas-10 sa gabii diha sa may CitiLink Terminal barangay Pahina Central ning dakbayan sa Sugbu

Gumikan kini sa reklamo sa usa ka 18-anyos nga dalaga nga taga N. Bacalso Ave. kay giingong gihinol-hinol niini ang pribadong parte sa iyang lawas.

Ang maong concerned citizen mipadangat sa iyang reklamo human giingong gipangayoa’g P5 mil sa mga police diha sa Carbon Police Station si Quiachon isip ‘piyansa’ aron makagawas kini sa detention cell

Gidayag niining naglibog sila kun nganong ang mga police sa Carbon Police Station mangayo’g P5 mil nga piyansa nga wala pa may kasong gipasaka ang nabiktima.

“Binuang nang taga Carbon Police Station nga korte man ang mohatag sa piyansa nganong sila may mo-demanda’g P5 mil? Para asa man diay na? Binuang nang ilaha gawas pa buotang tawo ang ilang gidakop,” sumala pa sa maong concerned citizen.

Gibutyag niining hubog gyud niadtong higayuna si Quiachon apan di tinuod nga nanghinol kini og babaye, ang tinuoray nga nahitabo mao nga kini nasaghiran lang atol sa ilang panagsugat sa dalan.

Si SPO1 Joseph Mandal, desk officer sa Carbon Police Station nga gikahinabi sa Banat News nagkanayon nga gidakop sa biktima pinaagi sa (citizen’s arrest) si Quiachon inabagan ni PO2 John Libres nga nadestino sa Police Regional Office (PRO-7) ug maoy mi-turnover niini sa Carbon Police Station

Tungod sa reklamo sa babaye nakatulog gyud si Quiachon sa karsel sugod pa niadtong Sabado sa gabii ug kagahapon lang sa alas 5:00 sa hapon gibuhian kay giingong dili na interesadong mopadayon sa kaso ang reklamante.

Apan si SPO1 Mandal mihimakak sa pasangil nga gipangayoan nila og kwarta ang suspek aron kini buhian, sumala pa niya nga nagpakiluoy mismo ngadto sa biktima ug mga ginikanan niini si Quiachon pagpangayo’g pasaylo uban sa iyang asawa, mga anak ug paryente.

Hinungdan nga pagka-ala una kagahapon sa hapon mipirma ang biktima ug mga ginikanan niini nga dili na mohinayon sa kaso.

Si Sr. Supt. Patrocinio Comendador, director sa Cebu City Police Office dihang gikahinabi sa Banat News mibutyag nga hangtud walay pormal nga gisang-at nga reklamo batok sa maong mga polis magpabiling ‘tabi-tabi’ lang ang pasangil.

Matud pa niya di mobarog ang bisan unsang administratibang imbestigasyon nga iyang himuon batok sa iyang mga sakop kun walay reklamante, giawhag niya ang mireklamo sa pagpatim-aw o ba kaha pagdangop sa laing investigative agency.   (BANATNEWS)