Maestra nailad og P500 mil

CEBU, Philippines - Mikabat sa P500 mil ang balor sa mga alahas, ug P50 mil nga cash, nasakiyo sa budol gang gikan sa usa ka 79-anyos nga maestra nga taga barangay San Isidro, dakbayan sa Talisay sa miaging adlaw.

Ang biktima mao si Editha Bajarias, 79, usa ka magtutudlo sa barangay San Isidro.

Ang mibiktima kang Bajarias mao ang duha ka mangingilad nga nagpailang magtiayon kinsa nakigtagbo kaniya sa usa ka mall sa Talisay. Ang biktima nga nagtibi nga misumbong sa kapolisan sa iyang kaagi nagkanayon nga nangompra siya niadtong higayona sa usa ka mall sa barangay Tabunok, Talisay, dihang miduol kaniya ang usa ka tawo nga nagpailang usa ka estudyante uban sa usa ka babaye nga giangkon niining iyang asawa.

Gumikan kay wala siya magtuo nga mangingilad, gipakuyog niya ang babaye ngadto sa ilang balay ug didto gitunol niya niini ang 9 ka mga kaarang alahas nga gibanabana niyang mokantidad og P500 mil.

Unya kay gipasaligan man siya nga kapin usa ka milyon ka pesos ang sulod nga kuwarta sa pula nga bag nga dala sa babaye, gipakapin niya ang cash nga P50 mil, dugang sa iyang siyam ka alahas sa pagtuo nga dako siya og ginansya gumikan sa nagbagal nga kuwarta sa bag sa babaye.

Dihadiha, human madawat sa babaye ang mga alahas ug ang kuwarta sa biktima, giariya dayon sa babaye ang bag nga kinandadohan ngadto sa biktima.

Apan dihang giablihan na kini sa biktima, dali kaayong gisanapan sa hilabihang kakurat, kaguol ug kalagot ang iyang dughan dihang nasuta niya nga mga ginunting ra nga newspaper ang sulod sa maong bag. – BANAT NEWS