CEBU, Philippines - Nalaksi ang walang bahin sa ulo sa usa ka 74-anyos nga lola human kini giunay pagtigbas gamit ang hait nga sundang sa iyang palahubog nga anak samtang kini nahinanok sa pagkatulog sa bukirang bahin sa barangay Conalom, lungsod sa Argao niadtong Sabado sa alas 2 sa kaadlawon.
Ang biktima mao si Andrea Templa, samtang ang giingong nagtigbas mao ra usab ang iyang kaugalingong anak nga si Condrado, 33, pulos molupyo sa nahisgutang lugar.
Matud ni PO1 Bernie Lao sa Argao Police Station sa dihang nahinabi sa Banat News, samtang nahinanok sa pagkatulog si Andrea sa ilang panimalay niadtong higayona kalit lang miabot nianang kaadlawon ang anak nga hilabihan kaayo kahubog.
Sa dihang nakasulod na sa balay, si Condrado mikuha og sundang sa kusina ug walay daghang estorya gitigbas niini ang iyang inahan nga natulog niadtong tungora.
Maayong pagka-igo sa walang bahin sa ulo ni Andrea apan maayo na lang gani kay natapsing lang kini ug nakuyapan hinungdan nga daling misibat ang anak ug sa pagresponde sa mga polis wala na kini maabti pa.
Samtang ang inahan nga si Andrea daling gidala sa iyang mga paryente ug silingan sa tambalanan ug gikatahong luwas na sa peligrong kahimtang. Naghulat pa ang kapolisan sa desisyon sa banay’ng Templa sa pagpasaka og kaso batok ni Condrado. – BANAT NEWS