5 mil ka bata gipakaon sa Lapulapu

CEBU, Philippines - Sobra sa 5 mil ka mga street children ug mga bata nga adunay kabilinggan sa lawas nakadawat sa ilang pinaskohan atol sa Christmas party nga gihimo sa mga sakop sa Local Council for Women, Child Protection and Nutrition sa Lapulapu City Auditorium kagahapon sa buntag.

Ang Christmas party gipangulohan ni Lapulapu City First Lady Paz Radaza nga maoy chairperson sa Local Council for Womens, Childrens Protection and Nutrition sa dakbayan sa Lapulapu.

Lakip usab sa mitambong mao ang committee chairman sa Konseho sa dakbayan sa Lapulapu nga si Queenie Malingin Ahmann, Konsehal Marcial Ycong ug Harry Radaza, executive secretary ni Mayor Arturo Radaza.

Matud pa ni Harry Radaza nga ang tumong sa maong organisasyon nga makahatag og kalipay sa 5 mil ka kabataan sa mainland sa Lapulapu diin naglangkob kini sa mga street children, abandonadong kabataan, rugby boys aron makabaton og pinaskuhan ning tuiga.

Apan base sa nasaksihan sa Banat News sobra na sa 5 mil ka mga bata ang mitambong sa maong kasadya diin naggikan usab sa nagkadaiyang barangay sa Lapulapu.

Atol sa kalihukan nakadawat ang kabataan og mga bundles of joy nga giapilan usab og mga dulaan nga gikan sa kaugalingong gasto ni Paz Radaza.

Lahi usab ang pagkaon nga gihatag sa mga ginikanan ug kabataan gikan local council nga gibanabanang mokabat sa P250 mil.

Matud pa ni Paz Radaza nga pito na ka tuig nilang gihimo ngadto sa kabataan ug magpadayon kini samtang anaa pa sila sa serbisyo.

Gipahibalo usab ni Radaza nga lahi usab nga Christmas party ang ilang himuon sa local council ngadto sa isla sa Olango diin posibleng idungan kini sa pagpahigayon og Christmas party sa mga empleyado sa maong isla sa umaabot Disyembre 20.

Tuyo sa maong grupo nga makahatag og kalipay sa 2 mil ka mga bata sa isla sa maong kalihukan. – BANAT NEWS