21-anyos giluba's 2 kainom

CEBU, Philippines - Patay ang usa ka 21-anyos nga lalaki human kini tabangi og luba gamit ang kutsilyo sa iyang duha ka kainom niadtong Sabado sa gabii diha sa sitio Campo 3, barangay Jaclupan, dakbayan sa Talisay.

Usa sa mga suspetsado giingong ex-convict ug niadtong Mayo 4, 2009 pa kini nakagawas gikan sa Talisay City Jail. Ang biktima giila sa mga polis nga si Jurivel Cabasa, ulitawo apan dunay kapuyo, residente sa nahisgutang lugar. Dali kining gidala sa iyang mga paryente ug silingan ngadto sa Talisay City District Hospital apan wala na kini makaabot nga buhi sa maong tambalanan.

Si Cabasa nakaangkon og mga samad dinunggaban sa wala ug tuong bahin sa iyang lawas nga gituohang hinungdan sa iyang kamatayon.

Ang mga suspetsado giila nga sila si Joel Fernandez, 34, ug Danny Boy Abadilla, 35, parehong mga ulitawo ug residente usab sa nahisgutang barangay. Dali silang nangikyas human sa hitabo ug padayon pang gipangita sa mga polis.

Si PO3 Mikie Espina ug PO2 Stephen Sefuesca daling miresponde sa hitabo ug nasayran nila nga love triangle ang motibo sa krimen. Base sa nahipos nga report nga usa sa mga suspetsado giingong dunay kanhi relasyon sa kapuyo ni Cabasa.

Si Cabasa ug ang mga suspetsado nag-inom sa wala pa mahitabo ang insidente ug sa dihang ang tulo pareho nang hubog mitumaw ang panaglalis.

Si PO3 Espina midugang nga si Fernandez napriso diha sa Talisay City Jail tungod sa paghupot niini og armas ug bag-ohay lang kining nakagawas gikan sa Talisay City Jail. – BANAT NEWS