Laing mga gilubong nga armas nakuykuyan sa Maguindanao

CEBU, Philippines - Laing gilubong nga mga armas ug bala ang nakuykuyan sa militar ug kapolisan sa usa ka dapit sulod sa rantsong gidudahang iya sa mga Ampatuan sa Maguindanao kagahapon.

Susama sa unang nakuykuyang gilubong nga mga armas duol sa mansyon ni Gov. Zaldy Ampatuan sa barangay Poblacion III sa Shariff Aguak, usa gihapon ka concerned citizen ang mi-report kabahin sa gipanglubong nga mga armas ngadto sa mga awtoridad.

Di hinuon susama sa nahaunang nakuykuyang mga armas ug bala, matud pa sa kasundaluhan dinali-dali ang paglubong niining ikaduhang nakuykuyan kay igo rang giputos og plastic ang mga bag-ong armas diha sa barangay Limpongo sa lungsod sa Datu Hoffer Ampatuan.

“May na-discover tayong firearms, 50-cal, M-16, machine guns. Ang estimate sa mga nakitang mga armas ay about 30 pero patuloy pa tayo sa paghuhukay baka meron pang nakabaon,” matud pang Lt. Col. Michael Samson, ang public affairs officer sa Philippine Army sa Shariff Aguak, sa interbyu sa dzBB radio diha sa report sa GMA News.

Pipila sa mga magbalantay sa maong rantso gipailawom na sa imbestigasyon sa CIDG.

Matud pang Samson ang rantso giingong iya ni Maguindanao Governor Andal Ampatuan Sr., kinsa gikustodiya na sa kapolisan tungod sa masaker niadtong Nobiyembre 23 nga mikalas og 57 ka tawo ug 30 ka mga sakop sa media.

Samtang gipahibalo sa PNP ug AFP nga duna sila'y gipatumang “Joint General Norms of Conduct of Police and Military Officers in the Field,” subay sa mga kritisismong nadawat tungod sa deklarasyon sa martial law sa Maguindanao nga prayoridad gyud ang proteksyon sa katungod sa mga tawo sa matag operasyon.

Samtang ang nasud sa Australia mikanselar una sa ilang mga proyektong hinabang sa Central Mindanao hangtud nga mabalik sa normal ang kahapsay ug kalinaw.

Sa laing bahin, ang abogado ni Maguindanao Gov. Andal Ampatuan Sr. gikatakdang mosang-at og writ of habeas corpus sa Davao City karong adlawa sa tinguhang di ihinayon sa awtoridad ang pag-aresto kaniya.

Ang maong abogado nga na-interbyu sa ANC niadtong Sabado miinsister nga wala gyud dakpa si Ampatuan. “There is no arrest order as far as we are concerned,” matud pa niini nga wala hinganli sa maong news network.

Matud pa sa maong abogado sa report sa ABS-CBN nga dili mahimong dakpon si Ampatuan Sr. tungod kay wala masuspenso ang writ of habeas corpus sa Davao City tungod kay ang Proclamation 1959 ni Presidente Gloria Macapagal Arroyo sa Maguindanao ra gipatuman.

Si Ampatuan Sr. gidala sa Davao Doctors' Hospital sa Davao City alang sa pagpahiling tungod kay kini nagluya ug duna kini sakit sa kasing-kasing kaniadto pa.

Dili sad mahimong dakpon si Ampatuan Sr. kun wala'y warrant of arrest tungod kay wala masakop sa Proclamation 1959 ang Davao City aron mahimong legal ang warrant less arrest. – BANAT NEWS