CEBU, Philippines - Gitinguha ni congressional aspirant Rene ‘r.e.’ Espina Jr. nga mahaw-as ang kapit-os ug kalisod sa pagpuyo sa katawhan diha sa ikaunom nga distrito sa lalawigan sa Sugbu kun siya maoy palarong modaog sa umaabot bugnong lugaynon sa sunod tuig.
Si Espina Jr. nga usa ka international economist ug anak sa kanhi senador ug gobernador nga si Rene ‘r.e.’ Espina Sr. nagkanayon sa mga tigbalita nga daghan kaayong mga informal settlers nga maoy angayang hatagan og pagtagad ug mga programang kapahimuslan sa katawhan.
Si Espina nga milansar isip independente nagtuong dako og kalainan ang iyang plataporma kumparar sa iyang mga kaatbang sa pagkakongresista nga sila si Luigi Quisumbing, (One Cebu Party) Victor Biano ug Balodong Cortes.
Kini bisan paman wala siya’y partidong nasyunal dili susama sa iyang mga kaatbang tungod kay alang kaniya ‘irrelevant’ kun walay kapuslanan ang national parties pag-abot na sa local elections tungod kay buwag man ang pagpili sa nasyunal nga kandidato ug sa lokal nga kandidato.
Si Espina dunay kompletong slate sa lungsod sa Consolacion nga gitawag niya’g Lucky ‘8’ nga mao si Teresa Alegado sa pagkamayor, ug bise mayor mao si Dr. Rey Damoli, samtang ang mga konsehal mao sila si Benjamin Ermac, Neil Ferraren, nga usa ka civil engineer, Julius Alegado anak ni Teresa ug uban pa.
Samtang sa lungsod sa Cordova giangkon ni Espina nga bisan tuod og wala siya’y gituboy nga modagan pagkamayor atbang ni incumbent mayor Adelino Sitoy, apan nagtuo siyang makakuha siya og daghang botos sa maong dapit.
Hinuon sa dakbayan sa Mandaue, nagkanayon siya nga mosuporta siya kang Mayor Jonas Cortes bisan tuod ug ang igsuon niining si Balodong Cortes iyang kaatbang.
Tungod sa hataas niyang kasinatian isip usa ka international economist, matud ni Espina usa sa iyang tinguha nga ang dakbayan sa Mandaue himuon niyang “city next to none” isip usa ka International Financial Center.
Matud pa ni Espina, sa pagkakaron walay mopahulam og mga puhunan sa mga ginagmay’ng negosyante ilabi na sa wala pa mailhi bisan paman og dunay kapabilidad ug abilidad nga makapalambo og negosyo, kun mahimong International Financial Center ang Mandaue di magduha-duha ang mga dagkong bangko sa gawas sa nasud nga mopahulam og kapital.
Si Espina nagkanayon nga iyang ipatuman ang PRIDE nga nangahulugang program for the resurgence of industrial development and excellence partikular na ang pagdasig sa mga kabus diha sa mga eskwater, kadalanan ug uban pa nga makat-on og libreng mga teknikal nga kursong magamit nila aron makatrabaho sa gawas sa nasud ug magamit pangabuhian.
Gihimo niyang ehemplo ang gibuhat sa nasud sa Germany nga wala magkinahanglang gradwado og kolehiyo ang empleyado sa nag-unang mga kompanya apan gumikan sa teknikal nga nakat-unan nakatrabaho sila ug milambo. - BANAT NEWS