Environmentalists ikiha

CEBU, Philippines - Naglaraw ang Kapitolyo nga mopasaka og kaso batok sa mga environmentalists nga mga miyembro sa Greenpeace International tungod sa pagpugos og sulod sa Balili Properties sa Tinaan, Naga niadtong Disyembre 1 ning tuiga nga walay pagtugot sa mga opisyales sa probinsiya.

 Kini human ang mga environmentalists mibahad nga mopasaka sila og tukmang kaso batok sa guard ug sa opisyales sa Kapitolyo tungod kay gipasalbahan sila sa gwardiya sa Kapitolyo nga gipabantay sa Balili Properties sa Tinaan, Naga.

 Si Capitol consultant on information Rory Jon Sepulveda miingon nga ang kagamhanan sa lalawigan sa Sugbu mipaimbestigar na sa gwardiyang mipabuto sa 18 ka mga environmentalists nga si Jasper Divinagracia sa mga labaw niini.

Apan giklaro ni Sepulveda nga ang Provincial Attorneys Office nagsugod sa ilang pagtuon alang sa pagduso og kaso batok na sa naasoy nga mga environmentalists.

 Matud pa ni Sepulveda nga si Divinagracia, mipa-blotter sa kapolisan sa lungsod sa Naga human sa maong insidente ug kini miingon nga may tulo ka babayeng misulod sa Balili Property ug ang usa niini nagpaila nga si Norenel Tolebas.

 Uban sa iyang kaubang guard on duty nga si Ronald Carreon ilang gipangutana ang tulo ug giingong igo ra silang mitubag nga mosusi sila sa lote duol sa dagat alang sa ilang adventure race nga “Kayaking.”

 Apan kay wala may permiso gikan sa Provincial Agriculture Office ila kining gipagawas, apan misulod og balik ang grupo agi sa laing gate duol sa Apo Cement ug may duha na ka mga van nga may sakay nga dul-an sa 20 ka mga tawo.

 Walo niini nagsul-ob og yellow suit sama sa sapot sa ‘astronaut’ (hazmat suit) ug may gas mask ug nagpa-picture dala ang banner nga may sulat nga, “stop coal ash, Green Peace,” tungod niini napugos si Divinagracia pagpasalba sa iyang shotgun. Gipasabot ni Sepulveda nga bisan og ang maong lote gipanag-iya sa probinsiya, wala kini magpasabot nga dili nalang mangayo og permiso ang naasoy’ng grupo pagsulod sa maong lote kay tugutan man unta nila ang motarong og pananghid.

 Nagkanayon si Sepulveda nga publicity lamang ang katuyuan sa maong grupo sa mga environmentalists. -  BANAT NEWS