Martial Law way basehan - Barcenas: Konstitusyon wa isuspenso

CEBU, Philippines - Nakasugat og pagsupak sa pipila ka mga inilang tawo dinhi sa Sugbo nga nakasinati og pagpangabuso sa panahon sa rehimeng Marcos ang deklarasyon ni Presidente Gloria Arroyo sa martial law sa Maguindanao Province sugod kagahapong adlawa.

Matud pa ni kanhi Cebu Vice Governor ug manlalaban Democrito Barcenas dihang nahinabi sa Banat News nga walay igong basehanan ang maong deklarasyon sa maong lugar kay subay sa balaod duha lang ka butang nga mahimong ikapatuman ang martial law kini mao kon gisulong sa laing nasud ang Pilipinas o ba kaha halapad nga rebelyon.

Sukwahi sa nahitabo sa Maguindanao nga nagumikan ang kagubot tungod sa politika tali sa impluwensyadong mga pamilyang ang Ampatuan clan ug Mangudadatu clan.

Gidugang ni Barcenas nga dili na angayan pang ipatuman ang martial law sa maong lugar ilabina kay duna nay gipangsikop nga sakop sa pamilyang Ampatuan sama nila ni Datu Unsay Mayor Andal Ampatuan Jr ug Maguindanao Governor Andal Ampatuan Sr. ug uban pa ingon man duna nay nagpadayong imbestigasyon sa maong panghitabu.

Duda hinuon si Barcenas nga paagi lang kini sa presidente aron makakita og basihanan aron makamugna og mga kasamok sa ubang bahin aron madeklarar ang ubang mga dapit dinhi sa nasud ubos sa martial law aron magpabilin siya sa gahum. Samtang si Kongresista Nerissa Soon-Ruiz sa ikaunom nga distrito sa text message nga gipadangat dinhi sa Banat News nagkanayon nga ilahang tukion sa sesyon karong Lunes ang deklarasyon sa pangulo. Gipasalig hinuon ni Ruiz nga wala kini magpasabot nga gisuspenso usab ang Konstitusyon.

“Meantime, people should stay calm because Martial Law does not suspend the Constitution, neither will the civil rights of the Filipino is lost. What is important is the government restores safety and order in Maguindanao…,” matud pa niini. - Darrel Carumba, Edwin Ian Melecio (BANAT NEWS)