Drayber sa taxi gitulis didto sa Talisay
CEBU, Philippines - Usa ka drayber sa taxi gitulis sa duha ka wala hiilhing tulisan didto sa sitio Uldog, barangay Poblacion, dakbayan sa Talisay sa miaging gabii.
Ang biktima mao si Arnold Fernandez, 50, nga taga Dumlog sa maong dakbayan ug drayber sa RD Taxi nga adunay plate number GXD-437.
Sumala kanila ni PO2 Roy Lofranco, PO2 Jay David ug PO2 Narciso Alforque, sa Talisay Police Station nga ang duha ka mga tulisan misakay sa gimanehong taxi ni Fernandez sa barangay Bulacao, dakbayan sa Sugbo ug nagpahatod kini ngadto sa Uldog.
Apan sa dihang miabot sila sa ngiob nga dapit sa Uldog, gitionan dayon sa mga tulisan og hait nga hinagiban ang drayber uban sa pahibawo nga tulis.
Nadala sa maong mga tulisan ang P650 nga kinitaan sa biktima sa ilang pagbiya sa maong lugar.
Sa pagkakaron gipangita na sa kapolisan sa dakbayan ang maong mga tulisan. - BANAT NEWS
- Latest
- Trending
