Sinsilyo giuli sa tulisan

CEBU, Philippines - Giuli sa duha ka tulisan nga nagtaptap sa nawong ang mga sinsilyo nga gihatag sa kahera sa burger stand sa barangay Sabang, dakbayan sa Danao ug gipangayoan gyud kini sa mga papel de bangko ug cellphone.

Si SPO4 Jose Salingua sa Danao Police Station miingon nga ang gitulis sa miaging gabii mao ang Angel Burger Machine.

Ang tindera ug kahera nga si Anafe Rota, 19, gitionan og kalibre .38 nga rebolber sa duha ka tulisan ug gipangayoan sa tibuok adlaw nga halin.

Gihakop sa biktima ang mga sinsilyo nga gisulod sa kaha sanglit ang mga papel de bangko gikuha na man sayo pa sa hapon sa tag-iya sa maong tindahan.

Si SPO1 Salingua miingon nga wala dawata sa mga tulisan ang mga sinsiyo ug nangita kini og cellphone apan wala gihapon dawata sa dihang nakita niini nga baratohon ang cellphone sa tindera.

Nagdali pahilayo sa maong dapit ang duha ka tulisan ug sa unahan maoy nasugatan ang balot vendor nga si Victor Comillas, 37, taga Pagutlan, Danao.

Gitionan si Comillas sa duha ug mideklarar nga tulis dungan ang pagpangayo sa halin sa gibaligya niining balot ug nangita pa og cellphone.

Si SPO4 Salingua miingon nga gumikan sa kahadlok walay nahimo ang biktima gawas sa paghatag na lamang sa P2 mil uban ang pagbalibad nga wala siya’y cellphone.  - Romeo T. Limpangog (BANAT NEWS)