Deportation ni McNeely libkas na diay -BID 7

CEBU, Philippines - Gilibkas na diay niadto pang 2008 sa mga sakop sa Board of Commissioners sa Bureau of Immigration and Deportation ang ‘deportation order’ nga giluwatan batok ni Perry McNeely human kini gipasakaan og kasong pagpanglugos ug pagpangmolestiya sa mga bata dinhi sa Sugbu unom na ka tuig ang nakalabay.

Si BID-7 regional director ug alien control officer Casimiro Madarang III nagkanayon nga human gibasura sa korte ang kaso ni McNeely niadtong 2003 gipaubos dayon kini sa blacklist ug giisip nga ‘undesirable alien.’

Apan nahibulong si Madarang sa dihang nasikop kini og balik gumikan sa pagpakig-uban og 14-anyos nga batang babaye sulod sa usa ka hotel, uban ang mga higala niyang mga Amerikano.

Sa pagsubay ni Madarang sa BID central office, gipahibalo siya kagahapon nga gilibkas na diay niadtong 2008 ang deportation order ni McNeely hinungdan nga nawala kini sa blacklist ug yanong nakabalik dinhi sa nasud.

Hinuon, wala mohatag og detalye si Madarang kun unsay gibasehan sa mga sakop sa Board of Commissioners sa BI sa paglibkas sa deportasyon ni McNeely, sanglit lakip usab siya ang nahibulong kalabot niini.

Si McNeely uban sa iyang mga higalang Amerikano nga sila si Michael Lopez ug Andre Breeding sa dihang nasikop sa kapolisan sa dakbayan sa usa ka hotel, kauban ang 14-anyos nga dalagita.

Kahinumduman nga si McNeely nag-atubang og kasong pagpanglugos ug pagmolestiya sa mga bata, hinungdan nga gipalayas kini sa Sugbo. Gihimakak hinuon niya nga usa siya ka pedopilya. - Bong Soriano (BANAT NEWS)