CEBU, Philippines - Duha ka mga guwardiya nga mipahigayon og surveillance sa usa ka negosyanteng Filipino-Chinese sa dakbayan sa Mandaue gipadakop kagahapon ug gitanggong sa Subangdaku Police Station. Ang duha ka guwardiya nga sila si Manolito Carreon ug Jessie Bugungon nga mga sakop sa Selected Security Agency nadakpan sa akto nga nag-surveillance sa compound nga gipanag-iya sa negosyante.
Mireklamo ngadto sa kapolisan si Jonas Sy tungod sa misteryosong pagtumaw nilang Carreon ug Bagungon sa iyang compound ug naglista-lista sa mga sakyanan nga mangabot, bisan wala kini sugoa sa negosyante.
Si Sy nga nahinabi sa kapolisan mibutyag nga duha na ka semana nga nagsige og bantay sa iyang compound ang duha ka gwardiya bisan walay mando gikan kaniya.
Tungod sa kabalaka, misumbong siya sa kapolisan aron masayran unsay tuyo sa duha ug kinsa ang nagsugo kanila.
Si SPO3 Alfredo Andales sa Subangdaku Police Station miimbestigar sa duha nga nagpunay og lista kun dunay moabot nga mga van ug de karga sa compound ni Sy.
Dugang pa ni Andales nga ang duha mitug-an kaniya nga igo lang sila nagtuman sa sugo sa ilang security agency. Matud nila gimandoan sila paglista sa mosulod ug mogawas nga van ug de karga. Gibutyag ni Andales nga sutaon sa kapolisan ang address sa security agency ug kun kinsa ang nagmando sa duha ka guwardiya. – BANAT NEWS