Mga environmentalista gipasalbahan sa sikyu sa Kapitolyo

CEBU, Philippines - Ang grupo sa mga environmentalists dinhi sa Sugbu nga sakop sa Greenpeace International gipasalbahan sa mga security guard sa Kapitolyo nga gipabantay sa kontrobersyal nga Balili Properties sa barangay Tinaan lungsod sa Naga.

Si Annie Lee nga maoy nangulo sa 18 ka mga miyembro sa maong grupo miadto niadtong Martes sa buntag sa Tinaan, Naga aron sa pag-survey ug pagkuha og picture sa gitambak nga coal ash sa maong lote.

Tuyo unta sa grupo nga ipresentar sa unom ka adlaw nga environmental conference sa Copenhagen, Germany sa sunod semana ang maong mga litrato.

Apan gikatahong gisugat sila og grupo sa mga gwardiya sa Kapitolyo ug ang uban nagpunay og sunod-sunod sa ilang mga sakop.

Matud pa ni Lee gipangitaan sila og permiso sa maong mga gwardiya nga makasulod sa propiyedad gikan sa buhatan sa gobernador nga wala usab nila, apan dihang ilang gipangutana ang gwardiya kun unsang matang sa permit ang pangayuon wala sad kini makatubag.

Mitumaw ang panaglalis tali sa ilang mga habig dihang miinsister silang makasulod tungod kay kini (lote) iya man sa publiko human mapalit sa lalawigan, apan ang pikas nga grupo sa mga security guard kalit nga mipabuto og shotgun ngadto sa laing grupo sa mga environmentalists hinungdan nga nanagan sila .

Dihang ilang gibalikan ug midemanda kun si kinsay mipabuto kanila nagdumili sila pagtug-an.

Sa ilang bahin, si environmental lawyer Atty. Gloria Estenso Ramos ug Benjamin Cabrido sa interbyu sa DyRF mikondenar sa gihimo sa mga gwardiya ug nanawagang ipaimbestigar ang maong mga gwardiya apil na ang mga opisyales sa Kapitolyo.

 “The governor and the supervising official of the Capitol should be held liable and accountable for damages,” matud pang Ramos.

 “It shows the abuse of power...nagpakita nga ang gobiyerno sa probinsiya walay respito sa rules of law,” dugang pa ni Cabrido.

 Samtang si kanhi senador Sony Osmeña mikwestyon usab sa pagbutang og security guard sa Kapitolyo sa Balili property.

 “Nganong nigasto man ang Kapitolyo sa pagpabantay sa Balili Property nga usa man kini ka public property?” matud pa sa kanhi senador ug midugang nga angayang kasuhan og illegal discharge of firearm ang maong gwardiya ingon man opisyales sa Kapitolyo.  – BANAT NEWS