2 ka barko gibawia'g sertipiko

CEBU, Philippines - Gisuspenso sa Maritime Industry Authority (Marina) ang safety certificate sa duha ka barko nga nagbangga niadtong Martes sa gabii sa Mactan channel, ilawom nga bahin sa unang Mandaue-Mactan bridge.

Si Engr. Mardon Martin, tigpamaba sa Marina, mibutyag sa Banat News kagahapon nga ipaubos una nila sa inspeksiyon ang MV Wonderful Stars nga usa ka passenger vessel sa Roble Shipping ug ang MV Subic Bay 1 nga usa ka cargo vessel sa Carlos Gothong Lines.

Matud niini nga dili nila tugotan nga makabiyahe   pag-usab ang nahisgutang mga barko hangtod maayo ang mga guba niini ug maseguro ang ‘seaworthiness.

Kahinumduman nga ang MV Wonderful Stars nga dunay 518 ka mga pasahero ug 70 ka mga tripulante paingon ngadto sa Ormoc samtang ang MV Subic Bay 1 nga dunay 57 ka tripulante naggikan sa Manila maoy nalambigit sa insidente.

Ang Roble Shipping mi-refund sa mga ticket sa tanang pasahero sa ilahang barko.

Walay naangol sa insidente, gawas niadtong tulo ka pasahero sa MV Wonderful Stars nga gidala sa tambalan aron ma-check up human kini mireklamo nga giatake sa   hypertension.

Apan matud ni Martin kagahapon sa hapon nga wala pa sila'y nadawat nga reklamo gikan sa Roble Shipping.  – BANAT NEWS

Show comments