104 ka kandidato sa Cebu - Comelec

CEBU, Philippines - Moabot sa 104 ka mga kandidato nga magpapili sa nagkadaiyang posisyon sa dakbayan sa Sugbo sa umaabot nga piniliay ang nakaduso sa ilang certificate of candidacy (COC) gikan sa pagbukas hangtod sa deadline sa pagsang-at niini niadtong miaging adlaw.

Mga 13 niini magpapili pagka-mayor nga sila si Michael Rama, John Henry “Sonny” Osmeña, Georgia Osmeña, Jacinto Iran, Crisologo Saavedra, Cristituto Abangan, Rodolfo Laconza, Samuel Darza, Salvador Solima, Anastacio dela Cruz, Fermiliano Dapitan, Ricci Ranili, ug Landolino Bontilao.Samtang walo usab ang gusto nga mamahimong bise mayor sa siyudad nga naglakip nilang Joy Augustus Young, Jonah John Rodriguez, Rico Palcuto, Emmanuel Pacquiao, Jovencio Talite, Jessica Go, Crescente Busalla ug Baby Ian Baguio.

Walo usab ang magpapili pagka-kongresista sa amihanang distrito nga naglakip nilang Cutie del Mar, Jacinto del Mar, Mary Ann delos Santos, Juan Arenasa, Ashley Acedillo, Florencio Villaren, Isabelo Osmeña, ug Miguel Selim.

Sa pikas bahin, unom usab ka mga kandidato ang magtigi sa pagka-kongresista sa habagatang distrito nga naglangkob nilang Tomas Osmeña, Jonathan Guardo, Leah Ong, Edgar Abadiano, Makilito Mahinay ug Rolando Aguanta.

Samtang 69 ka mga kandidato ang magharong alang sa pagka-konsehal, 35 niini sa south district ug 34 sa north district.

Ang Cebu City Comelec - North nga maoy gitahasan pagdawat sa mga COC nagpreparar na sa ilang report nga ipadala ngadto sa Comelec - province. Matud ni city election officer Marchel Sarno nga ang Comelec - province na maoy mopadala sa mga COC ngadto sa Comelec Manila.

Kini alang na usab sa pag-imprinta niini kun walay madawat ang ilang ulohang buhatan nga mga disqualification case. – BANAT NEWS