Barko mibangga sa laing barko

CEBU, Philippines - Parehong nakaangkon og kadaot ang duha ka mga barko human ang usa niini nga pampasahero mibangga ngadto sa laing barko nga de karga sa miaging gabii sa Mactan channel, ilawom sa unang Mandaue-Mactan bridge.

Naluwas hinuon ang tanang pasahero ug tripulante sa MV Wonderful Stars nga gipanag-iya sa Roble Shipping Lines human magkabangga sa MV Subic Bay 1, cargo vessel nga gipanag-iya sa Carlos Gothong Lines.

Nasayran sa Banat News nga ang MV Wonderful Stars adunay 519 ka pasahero ug tripulante paingon sa dakbayan sa Ormoc samtang ang MV Subic Bay 1 gikan sa Manila ug paingon na untang modunggo sa Pier 7 sa Mandaue.Ang matag habig daling mipadala sa ilang tugboat. Miabot usab dayon ang Philippine Coast Guard aron luwason ang tanang 519 ka mga pasahero ug tripulante sa MV Wonderful Stars nga mitakilid human sa insidente.

Kagahapon sa hapon, ang duha ka habig pormal nang nakaduso sa ilang marine protest ngadto sa Philippine Coast Guard.

Si Joy Roble, presidente sa Roble Shipping Lines mibutyag nga walay sayop nga nahimo ang ilang barko nga paingon untang mogawas sa Mactan channel.

Matud niya nga angay unta nga ang MV Subic Bay 1 maoy mohatag og agianan tungod kay dili mahimong magdungan og agi ang duha ka dagkong barko ilawom sa taytayan.

Hinuon giklaro ni Roble nga ilang giatiman ang tanan nilang pasahero ug ilang gi-refund ang ilang mga tiket tungod sa hitabo.

Miresulta kini sa pagkasangad sa MV Wonderful Stars tungod sa impact sa pagkabangga.

Ang mga pasahero gipahiluna sa Sugbutel, sumala pa ni Roble.

Samtang si Atty. Francisco Mejares, abogado sa Gothong Lines nga nahinabi sa Banat News mitug-an nga nakaduso na usab sila og marine protest ngadto sa PCG.Iyang gihimakak ang pasangil nga ang ilang barko maoy sad-an niadto sanglit dako kaayo ang ilang barko ug dili mahimong mopadaplin sa pagdagan sa Mactan channel.

Gani mitataw siya nga sa diha na sa ikaduhang taytayan ang MV Subic Bay 1 mihatag og mensahe sa tanang barko nga anaa sa pantalan nga paingon nang modunggo sa pier.

Apan nagkanayon si Mejares nga nakadesider ang kapitan sa MV Wonderful Stars nga molahos sa paglabang sa unang taytayan kay buot kining moilog aron makauna paglabang sa taytayan.“Gusto moilog ang kapitan sa (Wonderful Stars) unya kusog ilang dagan mao tong nakaigo sila namo, ug mitakilid ilang barko. Kay dako man ni among barko. Mokarga ni og 120 ka dagkong container vans,” matud ni Mejares.

Matud ni Mejares nga nagdagan ang ilang barko sa minimum safety speed nga anaa sa 5 knots.

Apan usa ka pasahero sa MV Wonderful Stars nga si Robert Talibao nagkanayon nga iyang nakita nga kusog ang dagan sa MV Subic Bay 1 nga nagdali nga makalabang ilawom sa taytayan.

Si Talibao nagkanayon nga duha ka kusog nga paka ang iyang nadungog ug nakita niya ang ubang mga pasahero nga natagak sa ilang mga kamarote. Matud niya nga nalisang ang mga pasahero.

Hinuon gitug-an ni Mejares sa Banat News nga nagka-istoryahanay sila ni Roble kagahapon ug nagkasinabot nga magtinabangay sa pagguyod sa MV Wonderful Stars.

Walay naangol sa insidente.

Ang tigpamaba sa Philippine Coast Guard nga si Lt. Mitchell Ursabia mibutyag nga ila nang nadawat ang marine protest sa duha ka habig ug karong semanaha ila nang sugdan ang paghimo og special board of marine inquiry.  – BANAT NEWS