CEBU, Philippines - Hilabihang nakasaway sa labaw sa Bando Osmeña Pundok Kauswagan (BOPK) nga si Mayor Tomas Osmeña ngadto sa gipadagan nga kandidato sa Kugi Uswag Sugbu (Kusug) pagka-mayor ug bise-mayor sa siyudad alang sa sunod tuig nga eleksyon.
Usa ka kanhi barangay kagawad sa Pit-os nga si Landolino Bontilao maoy standard bearer sa Kusug ug kini giparisan sa konbiktado nga si Jonah John Rodriguez.
Si Rodriguez gikonbikto sa hukmanan tungod sa pagpadala niini og mga text message ngadto sa asawa sa mayor nga si Margot nga naghulga ug nagbinastos.
Alang kang Osmeña dakong insulto ngadto sa mga Sugbuanon ang pagpadagan sa Kusug ug pilderong mga kandidato nga gidugangan pa ni Rodriguez.
Subay niini, giawhag sa mayor ang kadagkoan sa Kusug nga hatagan og igong respeto ang mga Sugbuanon ug dili insultuhon.
Una na hinuong gipasabot sa tigpamaba sa Kusug nga si Raymond Garcia nga sila si Bontilao ug Rodriguez temporaryo lang nila nga mga kandidato.
Gipadayag ni Garcia nga unya na sa Disyembre 14 mahibaw-an ang tinud-anay nga kandidato pagka-mayor ug bise mayor sa ilang partido.
Gipaabot sa Kusug nga makahukom na si GSIS president Winston Garcia sa dili pa ang maong adlaw kun modayon pagpapili pagka-mayor sa siyudad.
Kasaligang tinubdan gikan sa Kusug mibutyag nga kun modayon si Winston pagka-mayor sa siyudad, kini maoy hatagan og katungod pagpili sa iyang bise mayor.
Ang lider sa oposisyon nga si Jonathan Guardo sa iyang bahin nagpaabot kanus-a makadesider si Winston.
Si Jonji Gonzales, tigpamaba ni Guardo, nagkanayon sa dihang nahinabi sa Banat News nga sige ang komunikasyon sa kampo ni Guardo ug ni Winston.
Matud niya kulang na lamang niini ang pagpormalisar sa iyang kandidatura pinaagi sa pag-substitute ni Bontilao.
Gisalikway ni Gonzales ang huhungihong nga si Guardo maoy himuong bise mayor ni Winston. – BANAT NEWS