CEBU, Philippines - Usa sa mga M-16 rifles nga giisyu sa usa ka Civilian Volunteers' Organization (CVO) sa Maguindanao ang migawas nga positibong gigamit sa masaker sa 57 ka tawo niadtong Nobiyembre 23, sumala pa sa kapolisan sa report sa ABS-CBN.
Si Sr. Supt. Ericson Velasquez sa Criminal Investigation and Detection Group nagkanayon nga ang maong M-16 rifle maoy usa sa duha ka mga tag-as nga kalibre sa armas nga gipailawom sa ballistic examination nga gikumpiskar gikan sa duha ka mga gidisarmahang CVO sa militar human sa masaker.
Ang duha ka CVO nga naghupot niini gikustodiya na karon sa kapolisan sa Cotabato ug gipailawom sa imbestigasyon, pipila ka mga opisyal sa nahisgutang lalawigan ang mibutyag nga lakip sa miapil sa masaker mga sakop sa CVO ug kapolisan.
Ang kadagkoan sa kapolisan ug si Department of Interior and Local Government Secretary Ronaldo Puno mimando na sa pagpa-imbestigar sa lima ka mga opisyal sa kapolisan samtang gikatakdang relibuhan ang kapin usa ka libong polis sa maong lalawigan gumikan sa maong masaker.
Samtang ang tigpamaba sa Armed Forces of the Philippines (AFP) miklarong wala nila higpiti ang lihok sa mga Ampatuan clan sa Maguindanao.
"It might appear like that but their movements are not really restricted,” pagklaro pa ni Lt. Col. Romeo Brawner sa radio dzMM, agi og reaksyon sa pamahayag niZaldy Ampatuan nga gihigpitan ang ilang pamilya sa militar.
Ang igsuon sa ARMM governor nga si Datu Unsay Mayor Andal Ampatuan Jr., gipasakaan na og kasong 25 counts of murder tungod sa masakerug sila si Puno ug Justice Secretary Agnes Devanadera mihingalan usab sa walo pa ka mga Ampatuan nga posibleng suspek usab sa maong krimen
Ang mga Ampatuan mihangyo karon sa Supreme Court nga hunungon na ang mga “warrantless arrests” nga posibleng buhaton sa DOJ sa ilang mga kabanay kalabot sa masaker.
Si Maguindanao Governor Datu Andal Ampatuan, amahan ni Gov. Zaldy ug Mayor Andal Jr. ingon man unom pa ka mga kabanay ang misang-at og petisyon sa SC aron mopagawas og temporary restraining order (TRO) nga magdili sa mga awtoridad pagdakop sa ilang mga kabanay nga walay warrant of arrest sanglit walay preliminary investigation nga gihatag kanila.
Matud pa nila nga walay basehan ang warrantless arrest sanglit kapin sa usa ka semana na ang milabay gikan sa pagkahitabo sa krimen, ug wala say personal nga kasayuran ang mga awtoridad nga gibuhat sa mga gisuspetsahan ang krimen kay wala sila pagkahitabo niini.
“With regard to the warrantless arrest, several days have already passed so we have to consider some aspects because it might not be allowed anymore. Anyway, it does not mean that the DOJ has no other options to bring them to justice. We have other options,” maoy tubag ni Devanadera.- Edwin Ian Melecio, gikan sa Wires (BANAT NEWS)